Соторутааҕыта Дьокуускайга Николай Слепцов-Сылык “Чараас эйгэ” кистэлэҥэ” диэн саҥа кинигэтэ бэчээккэ таҕыста.
— Бу, “Чараас эйгэҕэ” үлэлээбит үлэм сыаната ыарахан… Бу эйгэҕэ киириэхпиттэн Саха сирин барытын кэриэтэ кэрийэн, экстремальнай айаннары айаннаан, суол саахалыгар ыараханнык оһоллонон, араас аномальнай көстүүлэргэ дьайдаран, өлө-өлө тиллэн, доруобуйам туругун алларытан туран үйэ чиэппэрэ үлэлээбит үлэм түмүгэ буолар..,
— диэн ааптар кинигэтин Аан тылыгар тута быһаарар.
Николай Иннокентьевич Слепцов-Сылык саҥа кинигэтигэр рецензеннэр бэйэлэрин санааларын, сыанабылларын биэрбиттэр.
Ульяна Винокурова, социология наукатын дуоктара, психологическай наука хандьыдаата, РАЕН академига:
“…Былыргы сахалар айылҕаны кытта алтыһан, сир түннүгэ, сир кулгааҕа буолан олорон, аһаҕас эттээхтэрэ, тулалыыр “чараас эйгэни” кытта дьүөрэлэһэн олорор ньымалары, сатабыллары тобулбуттара. Бэйэ бодотун хаһан да көрүнэ сылдьар үөрүйэхтээхтэрэ. Саха олоҕу анааран көрүүтэ сир-халлаан араас өрүттээх ситимнэһиилэрин чуолкайдык арааран, киһи аймах дьылҕатыгар “чараас эйгэ” сабыдыалын билиитэ материалистическай наукаҕа баттаттар да симэлийбэтэҕэ… “Чараас эйгэ” туһунан төрүт билиигэ-көрүүгэ… суолу-ииһи тэлбит киһибитинэн Николай Слепцов-Сылык буолар. Ону кини отучча сыл эти-сиини энчирэтэр сындалҕаннаах, тус бэйэтигэр суоһуур охсууну аахсыбакка туран, араас өрүттээх утарсыыны, күөнтээһини эрдээхтик тулуйан, утары суоһурҕаммат үтүө санаа арчытынан, алгыһынан харысхалланан үтүмэн дьону алдьархайтан, эрэйтэн, сортон-муҥтан быыһаата, босхолоото… Ирбэт тоҥ сирбит эриэ дэхси буолбатах. Кини хайдыбыт, сирин кырса алдьаммыт, уу дьөлө сиэбит иэннэригэр “өлүк” туруктаах ньэгир үөскүүр. Оннук “өлүк” сирдэр дьайыыларын мүлүрүтэргэ, тууйар-хаайар тыыннарыттан арчылыыр кыһалҕа үөскээтэҕинэ, ыксаабыт дьоҥҥо Сылык Ньукулай күн-ый курдук суолталанар… тус бэйэтин күөн туттан, хорсун, мындыр санаатынан, айылҕаттан айдарыллыбыт эриэккэс дьоҕурунан элбэх киһини быыһаабыт түбэлтэлэрин тустарынан бу кинигэҕэ ымпыктаан-чымпыктаан кэпсэнэр”.
Галина Попова-Санаайа, педагогическай наука хандьыдаата, М.К.Аммосов аатынан ХИФУ культурологияҕа кафедратын бэрэпиэссэрэ:
“…ааптар бэйэтин дьарыгыттан элбэх суол чахчылаах холобурдары аҕалар, чуо сирин-дойдутун, дьоно кимнээҕин ыйан туран. Дьиэни-уоту туттарга туһалаах, чахчы көдьүүстээх, норуот үгэстэригэр олоҕурар сүбэлэри биэрэр. Төрүт үгэһи, бэйэ култууратын билбэттэн, сыыһа-халты туттууттан, айылҕа кистэлэҥ күүстэрин билбэттэн, чуолаан, сир тыынын аахайбаттан, итэҕэйбэттэн тахсар чахчы буолбут иэдээннэри… холобурдуур. Ааптар “Дыхание вечной мерзлоты” (Якутск, 2013) диэн кинигэтин кэнниттэн киниэхэ дьон наадыйыыта аччаабатаҕа, соло гыммакка куруук ыҥыра, көмөлөһүннэрэ турара – бу саҥа кинигэтин сахалыы суруйарга сананыытыгар төрүөт буолбутун туоһута”.
Ааптар кинигэтигэр, ШАЛ диэн аан дойдуга аатырбыт аһара үрдүк энергиялаах космическай сардаҥалары хабан ылан чинчийэр установкаларга 10-тан тахса сыл үлэлээбитин, хайдах, кими көрсөн, ол көрсүһүү өйүн-санаатын тосту уларытан, ыарахан ыарыыттан босхолоноругар олук охсубутун, бастакы пациенын хайдах эмтээбитин, бэйэтин олоҕуттан о.д.а. чахчылары сиһилии кэпсиир уонна ааҕааччыларыттан, “…онон, үлэбин биирдэ туора соппокко, антах аспакка, саха дьонун сиэринэн сыта-тура сыаналаан ааҕыҥ”, — диэн көрдөһөр.
Кинигэ научнай эрэдээктэрэ — философия наукатын дуоктара, бэрэпиэссэр Андрей Саввинов.
Татьяна Маркова, edersaas.ru