Сылгылары кэтээн көрүүгэ-истиигэ аргыс ситимин туһаныы аан бастаан Хаҥалас улууһугар киллэрилиннэ.
Тыа хаһаайыстыбатын министиэристибэтэ Арассыыйа Наукаларын академиятын Биологическай проблемаларга институтун уонна Франция CLS хампаанньатын кытары бииргэ үлэлэһэн, сылгыны интэриниэтинэн кэтээн көрөр бырагыайы оҥордо. Аныгы сыыппара технологиятынан кэтээн көрөр бастакы моойторуктар бу ааспыт өрөбүллэргэ “Бөртө” сылгы собуотун атыырдарыгар кэтэрдилиннилэр.
—Бу тэрилинэн учуонайдар сылгы сууккатааҕы хамсааһынын, ханан сылдьан хаһарын, күҥҥэ төһө сири барарын үөрэтиэхтэрэ, — диир миниистири солбуйааччы Василий Афанасьев. — Оттон сылгыһыттар сылгы үөрэ ханан сылдьарын сылаас дьиэҕэ олорон кэтээн көрүөхтэрэ, наада буоллахтарына, чопчу тиийэн буолуохтара. Онон быйыл моойторук хайдах үлэлиирин, төһө көдьүүстээҕин көрүөхпүт.
Моойторуктар биир сыл устата үлэлиир болдьохтоох батарыайалаахтар итиэннэ байыаннай хаартаҕа сөп түбэһэллэр. Ол хаарталарга дэриэбинэлэр, өрүстэр, үрэхтэр, сайылыктар бары бэрт чуолкайдык ыйылла сылдьаллар. Бу күннэргэ моойторуктар Нам улууһугар “Эбэ” бааһынай хаһаайыстыбатын сылгыларыгар кэтэрдиллэллэр.
Раиса Сибирякова, «Саха сирэ» хаһыат, edersaas.ru