Андрей Находкин, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ:
— Ытыктабыллаах сылгыһыттар! Эһигини Ил Түмэн тыа сиригэр уонна аграрнай бэлиитикэҕэ сис кэмитиэтин, тус бэйэм ааппыттан Сылгыһыт күнүнэн итиитик-истиҥник эҕэрдэлиибин!
Сахалар Эллэй эһэбит саҕаттан төрүт дьарыкпытын илдьэ сылдьар омук быһыытынан аан дойдуга биллэбит, онон киэн туттабыт. Эһиги өҥүрүк куйааһы, бытарҕан тымныыны аахсыбакка сыспай сиэллээҕи, дьөһөгөй оҕотун бүөбэйдиигит, этиттэн-үүтүттэн ас арааһын оҥороҕут, сиэлэ-кутуруга уран тарбахтаахтарбыт дьэрэкээн оҥоһуктара буолан тахсаллар. Ат сүүрдүүтэ суох биир да улахан ыһыах, тэрээһин ыытыллыбат. Сылгыга, дьөһөгөй оҕотугар сүгүрүйэбит, ыһыах ыһабыт, алгыс тылынан көрдөһөбүт.
Ити барыта эһиги үтүмэн үлэҕит түмүгэр ситиһиллэрин өйдүүбүт, махтанабыт. Мээнэҕэ да бастакы Социалистическай Үлэ Дьоруойдарынан сылгыһыттар буолуохтара дуо?! Саха сылгыта, сүөһүтэ, ыта, быһаҕа — бу барыта саха норуотун быстыспат сорҕото! Эһиги эҥкилэ суох кыһамньыгыт, күүстээх үлэҕит түмүгэр, сылгы ахсаана аччаабат.
Сокуонунан «сылгы сылдьар ыыра, мэччийэр сирэ» диэн өйдөбүлү киллэрдибит, онон сирбитин-уопутун көмүскүүргэ кыһаллабыт. Саха норуота баарын тухары сылгыга сүгүрүйүү тохтуо суоҕа, өйдөбүл уонна өйөбүл күүһүрэн иһиэ. Үлэҕит-хамнаскыт тахсыылаах буоллун, тус олоххутугар дьол-соргу тосхойдун, күн-дьыл мэлдьи этэҥҥэ туран биэрдин!