Саха омук төрүт үгэһин, сылгыны үөрдээн иитиини, сайыннарар итиэннэ сылгыһыт аатын өрө тутар сыалтан кулун тутар 21 күнэ Сылгыһыт күнүнэн биллэриллэн, 2017 сыллаахтан бэлиэтэнэр.
Хаҥалас улууһун биллиилээх сылгыһыта, Саха АССР тыатын хаһаайыстыбатын үтүөлээх үлэһитэ, «Бочуот Знага» уордьан кавалера Николай Николаевич Ефимов 85 сааһын бэлиэтээһин чэрчитинэн «Хахсык» кэпэрэтиип базатыгар Сылгыһыт күнэ бэрт тэрээһиннээхтик ыытылынна.
Ат сүүрдүүтүгэр Хаҥаластан эрэ буолбакка, атын улуустар, ол иһигэр Сунтаар, Өлүөхүмэ, Мэҥэ Хаҥалас, Уус Алдан уонна Дьокуускай куорат хамаандалара эмиэ кэлбиттэр. Онон барыта 35 саха сылгыта уонна сиэнчэр сылгылар 800, 1200, 1600, 2400 уонна 3200 миэтэрэҕэ илин былдьастылар.
Дьокуускайтан Ольга Игнатьева «Надина Эльпис» диэн атынан 800 миэтэрэҕэ кытынна
Хаҥалас улууһун түөрт нэһилиэгин (Улахан Аантан «Бөртө» сылгы собуота, Нөмүгүттэн И.И.Ушницкай, Төхтүр уонна Хахсык) хамаандалара үгэс буолбут Сылгыһыттар күрэхтэһиилэригэр күөн көрүстүлэр. Кыайбыт хамаанда кулун тутар 21-22 күннэригэр Үөһээ Бүлүүгэ ыытыллар өрөспүүбүлүкэтээҕи Сылгыһыт күрэхтэһиитигэр улуус чиэһин көмүскүү барыахтаах, онон эппиэтинэс улахан.
Хас да түһүмэхтээх эрийсиилээх киирсии түмүгэр Иван Ушницкай хамаандата чорбойон таҕыста, салайааччы бэйэтэ «Улуус бастыҥ сылгыһыта» аатынан бэлиэтэннэ. Даҕатан эттэххэ, бу ааты улуус дьаһалтата улууска Үлэ уонна дьарыктаах буолуу үс сылын чэрчитинэн олохтообут. Иккис миэстэни «Бөртө» сылгы собуотун, үсүһү Төхтүр сылгыһыттара ыллылар. Онон, Иван Ущницкай уонна «Бөртө» хамаандалара Үөһээ Бүлүүгэ кытта барар чиэскэ тигистилэр.
Раиса СИБИРЯКОВА, Саха сирэ” хаһыат, edersaas.ru