2016 сыллаахха оччотооҕу Ил Дархан Егор Борисов «Саха Өрөспүүбүлүкэтигэр сылгыны үөрдээн иитиини сайыннарыы дьаһалларын» туһунан ыйааҕы таһаарбыта.
edersaas.ru
Бу ыйаахха саха төрүт дьарыгын сайыннарар, сылгыһыты өрө тутар сыалтан элбэх дьаһаллары тэрийэр этиллибитэ. Олортон биирдэстэрэ кулун тутар 21 күнүн Сылгыһыт күнүнэн биллэрии буолбута. Быйыл өрөспүүбүлүкэтээҕи Сылгыһыт күнэ кулун тутар 21-22 күннэригэр Мэҥэ Хаҥалас улууһугар Хараҕа, Куоҥ Харах ипподромугар Социалистическай Үлэ Дьоруойа Афанасий Степанов төрөөбүтэ 100 сылыгар ананан ыытыллар. Ону көрсө улуустарга Сылгыһыт күнүгэр анаммыт тэрээһиннэр саҕаланнылар. Ол курдук, Хаҥалас улууһун Хоточчутугар «Сылгыһыт күрэҕэр» сүүмэрдиир күрэхтэһиилэр уонна ат сүүрдүүтэ буолан ааста. Онно олохтоохтору таһынан Мэҥэ Хаҥалас, Уус Алдан, Чурапчы, Таатта уонна киин куорат хамаандалара күөн көрүстүлэр.
—Хаҥалас улууһун үрдүнэн бас билии көрүҥүттэн тутулуга суох 13,5 тыһ. сылгы, 93 сылгы баазата баар. Сылгыһыттар сырлаах үлэлэрин түмүгэр сылгы ахсаана сыллата эбиллэр, — диэтэ мустубут дьону улуус дьаһалтатын аатыттан эҕэрдэлииригэр Федор Борисов.
Салгыы тыа хаһаайыстыбатын улуустааҕы департаменын салайааччы Вячеслав Владимиров, I Дьөппөн нэһилиэгин баһылыга Сергей Прокопьев тыл эттилэр. “Покровскайдааҕы” УоПХ-ҕа сыспай сиэллээҕи иитиигэ өр сыллаах үтүө суобастаах үлэтэ сыаналанан, Нөмүгү олохтооҕо, үлэ бэтэрээнэ Анатолий Павлов “Саха Өрөспүүбүлүкэтигэр сылгыны үөрдээн иитиигэ киллэрбит кылаатын иһин” диэн түөскэ анньыллар бэлиэнэн наҕараадаланна.
Ыһыылаах-хаһыылаах, үгүс ыалдьааччылаах ат сүүрдүүтүн күрэхтэһиитин түмүгүнэн Нөмүгү хамаандата бастаата, “Бөртө” сылгы собуотун хамаандата иккис, Хоточчу хамаандата үһүс миэстэ буоллулар. Икки бастакы миэстэни ылбыт хамаандалар өрөспүүбүлүкэтээҕи күрэхтэһиигэ улуустарын аатын көмүскүүр чиэскэ тигистилэр. Иван Ушницкай ата сабыылаах күрэхтэһиигэ хотон, Хаҥалас улууһун дьаһалтатын анал бирииһин тутта.
Раиса Сибирякова, «Саха сирэ» хаһыат, edersaas.ru
Хаартыскалар: Хаҥалас улууһун дьаһалтата тиксэрдэ