Сылгы баазатын тутталларыгар үстүү мөлүйүөннээх сэртипикээттэри туттардылар

Сылгыһыт күнүгэр Ньурба улууһугар сылгы иитэр 18 хаһаайыстыбаҕа сылгы баазатын тутталларыгар анаан үстүү мөлүйүөн сууммалаах сэртипикээттэри СӨ Тыатын хаһаайыстыбатын миниистирэ Александр Атласов туттарда.

Миниистир бэлиэтииринэн, сылгы баазатын тутан сылгы төбөтүн ахсаанын элбэтии, сылгыны үөрдээн иитии төрүт дьарыгы үйэтитии судаарыстыба биир сүрүн өйөбүлэ буолар. 2017-2019 сс. өрөспүүбүлүкэ бүддьүөтүттэн биир сылгы баазатыгар мөлүйүөннүү солкуобай көрүллүбүт. Уопсайа 250 сылгы баазатын тутууга көмө оҥоһуллубут.

— Бу, биллэн турар, сылгы иитэр салаа сайдарыгар уонна төбө ахсаана элбииригэр сылгыһыттар интэриэстэрин биллэрдик үрдэппитэ. 2018 сыллаахха «2024 cылга диэри 200 сылгы баазатын тутарга уонна сылгы төбөтүн ахсаанын 209 тыһыынчаҕа диэри элбэтэргэ» диэн СӨ Ил Дарханын Айсен Николаев ыйааҕа тахсыбыта.

Ааспыт нэдиэлэҕэ Тыа хаһаайыстыбатын министиэристибэтигэр сылгы баазатын туттарыы төһө эрэ ороскуотун эбии субсидия көмөтүнэн туһанааччылары сүүмэрдээһин түмүктэммитэ. Хамыыһыйа быһаарбытынан, сылгыны үөрдээн иитэн эт оҥорон таһаарар 18 хаһаайыстыбаны сайыннарыыга биэрэр туһунан быһаарбыттара. Маннык судаарыстыбаннай өйөбүлү ылааччылар истэригэр 9 – бааһынай хаһаайыстыба, 2- чааһынай урбаанньыт, 2 – тыа хаһаайыстыбатын оҥорон таһаарар кээпэрэтиип, 3 – ХЭУО, 2 – оҥорон таһаарар кээпэрэтиип. Хамыыһыыйа көрөрүгэр уопсайа 82 сайаапка 20 улуустан уонна Дьокуускай куораттан киирбит.

Ульяна ЗАХАРОВА.