«Саха сирэ» хаһыакка уонна edersaas.ru cаайтпытыгар алтынньы саҕаланыыта «Белай муораҕа саха сылгыларын дьылҕата» диэн матырыйаал тахсыбыта. Санатан этэр буоллахха, аҕыс уонус сыллар бүтүүлэрэ Саха сириттэн уон түөрт саха сылгытын Мурманскай уобаласка “Беломорский рыбак” олохтоох холкуос атыыласпыт.
Холкуос улахан барыһы ылбакка, баҕар сатаан көрбөккө буолуо, сылгылары көҥүл ыытан кэбиспит. Кузомень сэлиэнньэҕэ сылгы мэччийэр сирэ суох буолан, билигин кинилэр өлөр-тиллэр икки ардынан сылдьаллар.
Хаһыат эрэдээксийэтиттэн Терскэй оройуон баһылыгын аатыгар сурук суруйдубут. Онуоха баһылык эппиэттээбэтэ. Кузоменьҥа сылгылары аһынан, бэйэтин харчытыгар аһатар, көрөр-харайар Наталья Чунина эппитин санаан кэллим, «маннааҕы былаас кинилэргэ наадыйбат, хаста да көмө көрдөөбүтүм».
Кыстыкка бэлэмнэнии кэмигэр, балаҕан ыйыгар Натальялыын кэпсэтэрбэр: “Виктория, хайыыбын? Бэйэм да билбэппин”, — диэн хаста да ыйыппыта. Онтон аҕыйах хонуктааҕыта кэпсэтэрбитигэр, «быйыл сыл тахсар оппутун буллубут, онон бэйэбит да олорон көрүөхпүт» диэн хардарда. Кэргэнэ Яков олохтоох цыганнартан сылгыны хайдах көрөр туһунан маастар-кылаас ылбыт үһү. Онон, быйыл эмиэ Чуниннар бэйэлэрэ кыстатар санаалаахтар эбит.
Дэриэбинэ, биллэн турар, ону сөбүлээбэт. Ол эрээри, хайыахтарай, номнуо отучча сыл Кольскай полуостровка олорон кэлбит саха үөрүн сылгытыгар Кузомень сэлиэнньэтэ дьиэлэрэ буолар буоллаҕа…
Виктория Бястинова, «Саха сирэ» хаһыат, edersaas.ru