Сылдьыбыттыы сананным! Көрбүт тэҥэ астынным!

Ааптар: 
Бөлөххө киир:

Нэдиэлэ кэриҥэ Горнай улууһа Бэрдьигэстээх «ЧЫПЧААЛ» стадионугар ХХI МАНЧААРЫ оонньууларын үрдүк таһымнаахтык тэрийэн ыытта.

Горнайдарга махтал! Сөҕүү! Билинии! Маннык тылларынан саҕалаан туран Уус Алдантан Полина-Победа хоһооннорун анаата.

 «ЧЫПЧААЛ»СТАДИОН

Олус бэргэн сэдэх ааттаах
» Чыпчаал» дэммит стадион
Көрүлээтэ, күннээтэ
Муста бастыҥ дьоннору.

Сүүрүк, тустуук, кылыыһыт,
Суруналыыс үтүөтэ,
Бас-көс дьоммут биир тыыҥҥа
Алтыстылар «Чыпчаалга».

Успуорт эйгэ дьэ кыахтаах
Дьону түмэр сүдү күүс!
Чахчы дьиҥнээх чөл олох
Тыына манна билиннэ.

Кыһыл көмүс мэтээл да
Суудайбата «сууйууга»,
Хаһаайынын булунан
Кыахтаах түөскэ ыйанна !

Горнай сирэ кыахтаахтык
Манчаарыны тэрийдэ!
Уустук кэмтэн сылайбыт
Дьоннор сэгэс гыннылар!

Бастыҥ «Тэтим» долгуна
Тэҥҥэ ону сырдатта,
Сылдьыбыттыы сананным!
Көрбүт тэҥэ астынным!

Сааскы сүүрүк кэриэтэ
Ыллаабат да ыллаата!
Үөрүү эрэ долгуна
Уйаланна дууһаҕа!

 Горнай сирин хаһан да умнуллубат, умуллубат СУЛУСТАРЫН туойабын.
 ИНИ БИИЛЭР
/суруйааччы Софрон, Семён Даниловтарга ананар/

Дьоллоох Ийэ оҕолоро!
Дьоллоох Горнай уолаттара!
Дьоллоох саха дьонноро
Убай-быраат Даниловтар!

Соппуруоннаах Сэмэммит
Табыллыбыт, талыллыбыт,
Таҥыллыбыт талааннаах
Саха чулуу дьонноро!

Икки харах курдуктар,
Икки кулгаах кэриэтэ,
Икки илии-атахтыы
Арахсыспат аргыстар.

Хайалара даҕаны
Тэбис тэҥҥэ кыах ааттар!
Иккиэн ини-биилэрбит
Эрбии тииһин курдуктар!

Саха өйүн, санаатын
Сапка тиспит курдуктар
Дьоһун мааны дьоннорбут
Ааҕар, таптыыр ааттарбыт!

ҮЙЭ БИИР БЭЛЭҔЭ
/ырыаһыт Р.Захароваҕа ананар/

Горнайдар кыыстара!
Горнайбыт куолаһа!
Күөрэгэй даҕаны
Тэҥнэспэт куолаһа.
Ол саха Далбара
Ырыаһыт РАИСА!

Сүтэрэн бараммыт
Билинэр сүрэхпит
Бу кэрэ куоласпыт
Үйэ биир бэлэҕэ!
Ол саха Далбара
Ырыаһыт РАИСА!

Күрүлгэн кэриэтэ
Кутуллар күүс куолас
Үөһэттэн анаммыт
«Ыллаа-туой» дэттэрбит.
Ол саха Далбара
Ырыаһыт РАИСА!

Элбэхтэ эргитэн
Истэбин ырыатын,
Күн сирин бу куолас
Киэргэтэн ааспытын.
Ол саха Далбара
Ырыаһыт РАИСА!

ЧЕМПИОН!
/Үс бырааттыы Контоевтарга ананар/

Остуоруйа олоҕор
Үстүү уоллаах буолаллар,
Онтон биирэ наар Иван,
Чулуулара үстэн биир.

Оттон Горнай сиригэр,
Сэмэй саха ыалыгар
Төрөппүттэр үс уолу
Балбааралаах Ыстапаан.

Төрөппүттэр, ииппиттэр
Чемпионнар үүммүттэр!
Аан дойдуга ааттара
Дуораан буолан дуорайбыт!

Хоһоон, кэпсээн суруйан
Сөптөөх тылы булбаппын,
Үс чемпион биир ыалтан
Тахсыбыта — бу КЫАЙЫЫ!

Горнай сирэ — ЧЕМПИОН!
Үс бырааттыы — ЧЕМПИОН!
Саха ыала — ЧЕМПИОН!
Саха сирэ — ЧЕМПИОН!

                                Полина-Победа,
                                             Уус Алдан. 

Хаартыскаҕа Мария Васильева (СИА) түһэриитэ

+1
0
+1
0
+1
0
+1
0
+1
0
+1
0
+1
0