Маны аах Үөрэх уонна наука

“Сыл учуутала” куонкурус саҕаланна

Бэҕэһээҥҥиттэн 30-с төгүлүн ыытыллар “Сыл учуутала-2021” өрөспүүбүлүкэтээҕи куонкурус саҕаланна. Сыл саамай улахан куонкуруһугар Саха сирин араас муннугутан 27 учуутал сүүмэрдэнэн кэллэ.

edersaas.ru

Тэрээһин үөрүүлээх аһыллыытыгар СӨ үөрэҕин уонна наукатын миниистирэ Михаил Сивцев куонкурус кыттааччыларын эҕэрдэлээн туран: “Америка философа Синди Хук учуутал үөрэх тэбэр сүрэҕинэн буолар диэн этэн турардаах. Бүгүн учууталларга саамай улахан куонкурус саҕаланар. Бүгүн бу саалаҕа дьиҥнээх профессионаллар мустан олороҕут.

Оскуола барыта аныгы тэрилинэн хааччыллан турар буолбатах, оскуола бары биридимиэттэргэ учууталынан хааччыллан олорор буолбатах. Ол да буоллар талааннаах, тэрийэр дьоҕурдаах кэлэктиип сатабыллаах үлэтинэн биллэр-көстөр дьону үүннэрэн таһаараллар, олор ситиһиилээхтик үлэлииллэр, ырыынак усулуобуйатыгар күөн күрэстэһэр кыахтаахтар. Ситиспит ситиһиигитинэн тохтоон хаалбакка, салгыы сайдан иһиҥ. Арассыыйа куонкуруһугар кыайбатаххытына даҕаны иннигит диэки дьүккүөрдээхтик баран иһиҥ. Бу саалаҕа биһиги өрөспүүбүлүкэбит чаҕылхай сулустара олороҕут”, — диэн кыттааччыларга ситиһиилэри баҕарда.

Үөрэҕи сайыннарар уонна идэ таһымын үрдэтэр институт дириэктэрэ Ньургун Павлов: “Куонкурус уопут атастаһар, инники, саҥа сүүрээни кытта билсэр, үөрэх атын тэрилтэлэрин кытта сибээһи олохтуур  былаһаакканан буолар. Учуутал – үөрэх систиэмэтин саамай тутаах киһитэ. Быйылгы куонкуруска өрөспүүбүлүкэ араас муннугуттан оскуола, улуус таһымнаах түһүмэххэ бастаан, барыта 27 учуутал кытта кэллэ. Эһиги номнуо кыайыылаах буолаҕыт”, — диэн этэн туран кыттааччылары эҕэрдэлээтэ.

Манна даҕатан эттэххэ, Ньургун Михайлович бэйэтэ “Сыл учуутала” куонкуруска кыттан, биэс бастыҥ учуутал кэккэтигэр киирбитэ. Онон куонкурус хайдах ааһарын иһиттэн билэр салайааччы.

Куонкуруска кытта кэлбит Амматааҕы лиссиэй дириэктэрин солбуйааччы, информатика учуутала Николай Петров:

СГУ математикаҕа уонна информатикаҕа институтун бүтэрбитим. Оскуолаҕа 12-с сылбын үлэлиибин. Сүрүн үлэм таһынан робототехникаҕа, 3D моделированиеҕа, мобильнай сыһыарыылары оҥорууга, “интернет вещей” оҕолорго эбии дьарыктары ыытабын.

Бу идэни көрдөрөр куонкурус буолар. Эрдэттэн анаан-минээн бэлэмнэнэр ирдэнэр эбит. Учуутал үүнэригэр-сайдарыгар сөптөөх, туһалаах тэрээһин. Куонкуруска кыттаары араас саҥа үлэлэри, идиэйэлэри толкуйдаан таһаардахтара буолуо дии саныыбын.

Ааспыт нэдиэлэҕэ “АйТи – мин идэм” күрэхтэһии улуустааҕы түһүмэҕэ буолан ааста. Үөрэнээччилэрбитин онно кытыннарбыппыт. Лиссиэйбит иһинэн “Старт в космос” дэкээдэтин ыыта сылдьабыт, олимпиадата буолла. Онон бириэмэ төһө да ыгым буоллар, үлэ быыһыгар төһө кыалларынан бэлэмнэнним, — диэн санаатын үллэстэр.

 

“Сыл учуутала-2021” өрөспүүбүлүкэтээҕи куонкурус кыттааччылара:

  1. Михаил Аркадьевич Самсонов (Мэҥэ Хаҥалас улууһун В.П. Ларионов аатынан Майа орто оскуолатын историяҕа, обществознаниеҕа учуутала)
  2. Мария Владимировна Слепцова (Уус Маайа улууһун Петропавловскай орто оскуолатын математикаҕа учуутала)
  3. Григорий Григорьевич Горохов (Үөһээ Дьааҥы улууһун Табалаах орто оскуолатын технологияҕа учуутала)
  4. Анна Ивановна Михайлова (Сунтаар улууһун Тойбохой орто оскуолатын нуучча тылын уонна литэрэтиирэтин учуутала)
  5. Анна Руслановна Васильева (Горнай улууһун С.П. Данилов аатынан Бэрдьигэстээх орто оскуолатын нуучча тылын уонна литэрэтиирэтигэр учуутала)
  6. Максим Иванович Воронов (Бүлүү улууһун И.Л. Кондаков аатынан гимназия англияҕа тылын учуутала)
  7. Татьяна Николаевна Федотова (Өлөөн улууһун Х.М. Николаев аатынан Өлөөн орто оскуолатын алын кылааһын учуутала)
  8. Сергей Владимирович Борисов (Уус Алдан улууһун Өспөх орто оскуолатын историяҕа, обществознаниеҕа учуутала)
  9. Мария Захаровна Винокурова (Нам улууһун Нам 2-с нүөмэрдээх орто оскуолатын историяҕа, обществознаниеҕа учуутала)
  10. Кыдана Михайловна Екечьямова (Чурапчы улууһун С.К. Макаров аатынан гимназия математикаҕа учуутала)
  11. Александра Петровна Борисова (Үөһээ Бүлүү улууһун М.А. Алексеев аатынан гимназия нуучча тылын уонна литэрэтиирэтин учуутала)
  12. Елизавета Ивановна Неустроева (Таатта улууһун И.П. Жегусов аатынан гимназия нуучча тылын уонна литэрэтиирэтин учуутала)
  13. Саина Григорьевна Романова (Абый улууһун Н.Н. Ефимов аатынан гимназия физикаҕа учуутала)
  14. Кадыр Леонидович Казакбаев (Алдан улууһун Алдан 9-с нүөмэрдээх орто оскуолатын историяҕа учуутала)
  15. Дина Сергеевна Егорова (Уус Маайа улууһун Петропавловскай орто оскуолатын нуучча тылын уонна литэрэтиирэтин учуутала)
  16. Валентина Алексеевна Третьякова (Дьокуускай куораттааҕы Айыы Кыһата гимназия нуучча тылын уонна литэрэтиирэтин учуутала)
  17. Анастасия Дмитрьевна Захарова (Ньурба улууһун Ньурба 2-с нүөмэрдээх орто оскуолатын англия тылын учуутала)
  18. Ирина Владимировна Гончарова (Нерюнгри улууһун Нерюнгри куорат 1-кы нүөмэрдээх гимназиятын математикаҕа учуутала)
  19. Галина Юрьевна Габышева (Үөһээ Бүлүү улууһун Ороһу орто оскуолатын биологияҕа, химияҕа учуутала)
  20. Анна Ивановна Кокоткина (Өлүөхүмэ улууһун Өлүөхүмэ куорат Н.Н. Яковлев аатынан 1-кы нүөмэрдээх оскуолатын алын кылааһын учуутала)
  21. Николай Николаевич Петров (Амма улууһун Л.В. Киренскэй аатынан Амма лиссиэйин дириэктэрин үөрэтэр-иитэр үлэҕэ солбуйааччыта, информатикаҕа учуутала)
  22. Мария Иннокентьевна Аммосова (Эбээн Бытантай улууһун Саккырыыр орто оскуолатын нуучча тылын уонна литэрэтиирэтин учуутала)
  23. Юлия Михайловна Захарова (Хаҥалас улууһун Өктөмнөөҕү научнай-үөрэтэр киин нуучча тылын уонна литэрэтиирэтин учуутала)
  24. Анна Сергеевна Конова (Дьокуускай куорат 23-с нүөмэрдээх орто оскуолатын омук тылын учуутала)
  25. Валентина Ефимовна Ефремова (Уус Маайа улууһун Петропавловскай орто оскуолатын англия тылын учуутала)
  26. Ульяна Борисовна Посельская (Өймөкөөн улууһун Томтор орто оскуолатын химияҕа учуутала)
  27. Ньургустана Николаевна Уваровская (Кэбээйи улууһун Мастаах орто оскуолатын историяҕа уонна обществознаниеҕа учуутала).

 

Людмила ПОПОВА, “Саха сирэ” хаһыат, edersaas.ru

Ааптар хаартыскаҕа түһэриилэрэ.

1
0
Telegram @edersaas20