«Сыл учуутала-2022» куонкурус саҕаланан эрэр

Учууталларга биир саамай долгутуулаах, ким кыайыылааҕынан ааттанна диэн сэҥээриллэр “Сыл учуутала” куонкурус өрөспүүбүлүкэтээҕи түһүмэҕэ саҕаланан эрэр.

edersaas.ru

СӨ Үөрэҕи сайыннарар уонна идэ таһымын үрдэтэр институт педагогическай маастарыстыбаны сыаналыыр кафедратын сэбиэдиссэйэ Елизавета Яковлева:

— Бүтүн Арассыыйатааҕы “Сыл учуутала” куонкурус оскуола иһинээҕи таһымыгар барыта 438 учуутал кыттыбытыттан, улуустааҕы түһүмэххэ 252 учуутал тахсан, муус устар 4 күнүттэн ыытыллар өрөспүүбүлүкэтээҕи күөн күрэскэ 29 кыайыылаах учуутал кэлэн кыттыаҕа.

Куонкурус федеральнай суударыстыбаннай ыстандаарт ирдэбилигэр сөп түбэһиннэрэн барар. Учуутал сүрүн үлэтэ – уруок. Иитэр үлэтэ кылаас чааһынан көрдөрүллүөхтээх. Бу күөн күрэс сүрүн түһүмэхтэринэн буолаллар.

Маҥнай бары күргүөмүнэн “Методическай мастарыскыай”, “Уруок” түһүмэхтэргэ кыттыахтара. Ол кэнниттэн 15 учуутал финалга киириэҕэ. Манна “Кылаас чааһы”, “Маастар-кылааһы” ыытыахтара. Ол кэнниттэн биэс чулуу учуутал быһаарыллан, кыайыылаах аатын сүгүөхтэрэ. Биэс кыайыылаах учуутал хаалан “Сыл учууталыттан ыйытыы” пресс-кэмпириэнсийэ” диэн түһүмэххэ суруналыыстар ыйытыыларыгар хоруйдуохтара. Ол түмүгүнэн Саха Өрөспүүбүлүкэтин “Сыл учуутала” күөн күрэс муҥутуур кыайыылааҕа талыллан, салгыы Арассыыйа куонкуруһугар Саха сирин аатын көмүскүү барыаҕа, — диэн иһитиннэрдэ.

Санатан эттэххэ, куонкурус 2022 сыл муус устар 4-9 күннэригэр буолуоҕа. Тэрээһини СӨ Үөрэҕи сайыннарар уонна идэ таһымын үрдэтэр институт иилээн-саҕалаан ыытар.

Кыттааччылар:

1. Нафанаилова Валентина Гаврильевна (Уус Алдан улууһун Лөгөй оскуолата);
2. Дмитриев Александр Саввич (Үөһээ Бүлүү улууһун Үөһээ Бүлүүтээҕи 4-с нүөмэрдээх оскуолата);
3. Тартыев Артур Сергеевич (Ньурба улууһун Ньурба 2-с нүөмэрдээх оскуолата);
4. Тарасова Туйаара Владимировна (Орто Халыма улууһун Орто Халыма оскуолата);
5. Владимирова Людмила Федоровна (Мэҥэ Хаҥалас улууһун Аллара Бэстээх 2-с нүөмэрдээх оскуолата);
6. Афанасьева Яна Афанасьевна (Бүлүү улууһун Бөкчөҥө оскуолата);
7. Бочарова Оксана Столетовна (Дьааҥы улууһун Адыаччы оскуолата);
8. Иванов Александр Иванович (Таатта улууһун Ытык Күөл 1-кы нүөмэрдээх оскуолата);
9. Матаркина Сайина Семеновна (Эдьигээн улууһун Эдьигээн оскуолата);
10. Коновалова Наталья Сергеевна (Ленскэй улууһун Ленскэй 2-с нүөмэрдээх оскуолата) ;
11. Ю Сидор Маркович (Эбээн Бытантай улууһун Дьарҕалаах оскуолата);
12. Дмитриева Сахаяна Степановна (Булуҥ улууһун Быковскай оскуолата);
13. Баранова Елена Александровна (Жатай 1-кы нүөмэрдээх оскуолата);
14. Дьячковская Снежана Владимировна (Муома улууһун Улахан Чыыстай оскуолата);
15. Ераскумова Айана Еремеевна (Уус Маайа улууһун Петропавловскай оскуолата);
16. Ефимова Валентина Иннокентьевна (Усуйаана улууһун Силээннээх оскуолата);
17. Новикова Наталья Иосифовна (Амма улууһун Бөтүҥ оскуолата);
18. Кривошапкина Ольга Гэрэловна (Нам улууһан Нам 1-кы нүөмэрдээх оскуолата);
19. Максимова Прасковья Дмитрьевна (Чурапчы улууһун С.А. Новгородов аатынан оскуолата);
20. Санникова Лилия Семеновна (Кэбээйи улууһун Лүксүгүн оскуолата);
21. Михайлов Дмитрий Айалович (Сунтаар улууһун Сунтаар 1-кы нүөмэрдээх оскуолата);
22. Саранчина Галина Сергеевна (Нерюнгри улууһун Беркакиттааҕы 22-с нүөмэрдээх оскуола);
23. Габышева Виталина Михайловна (Өлүөхүмэ улууһун “Эврика” улуустааҕы гимназията);
24. Дьяконов Иван Герасимович (Горнай улууһун Бэрдьигэстээх улуустааҕы гимназията);
25. Кейметинов Айсен Иванович (Нам улууһун I Хомустаах оскуолата);
26. Трофимова Лилия Ивановна (Дьокуускай куорат 36-с нүөмэрдээх оскуолата);
27. Степанова Маргарита Петровна (Өлөөн улууһун Ээйик оскуолата);
28. Чудиновская Нюргуяна Валентиновна (Хаҥалас улууһун Покровскайдааҕы 3-с нүөмэрдээх оскуола);
29. Атастырова Елена Васильевна (Томпо улууһун Мэҥэ Алдан оскуолата).

Людмила ПОПОВА, “Саха сирэ” хаһыат, edersaas.ru