Биэс күн устата барбыт “Сыл учуутала-2019” куонкурус бэҕэһээ түмүктэннэ. Кыайыылааҕынан Уус Алдан улууһун Суотту оскуолатын историяҕа, обществознаниеҕа учуутала Роман Оконов буолла.
edersaas.ru
Роман Оконов Саха сиригэр 2014 сыллаахха дойдутугар Калмыкияҕа университеты бүтэрээт даҕаны кэлбитэ. 2017 сыллаахха “Илин эҥээр бастыҥ учуутала” куонкуруска кыттан бастаабыта.
— Саха сиригэр тымныы диэн истэрим. Төрөппүттэрим дойдубуттан ыраах олорорбун, үлэлиирбин билигин даҕаны утараллар. Ол эрээри, бэйэм тымныыны сөбүлүүбүн. Калмыкияҕа эмиэ тымныы. Ол гынан баран, биһиэхэ сытыы тыаллаах, -20 кыраадыс тымныы буоллаҕына, манна -50 кыраадыс тымныыга тэҥнээх диэххэ сөп. Маҥнай кэлэн баран соһуйбутум. Сахалыы уопсай туттуллар тыллары билэбин.
Толору хааччыллыылаах кыбартыыраҕа олоробун, оһох эҥин оттубаппын. Муус ылыыга сылдьыһабын. Муҥхаҕа, булка кэллиэгэлэрбин кытта барабын. Саха сиригэр ордук кыһынын олус кэрэ айылҕалаах. Дьоно-сэргэтэ аһаҕастар, элэккэйдэр.
История, обществознание оскуола бырагырааматыгар саамай интэриэһинэй биридимиэттэр. Онон үөрэнээччилэр сэҥээрэллэр. Манна, биллэн турар, учуутал бэйэтин хаачыстыбата эмиэ ирдэнэр дии саныыбын. Оҕону умсугутар, нууччалыы эттэххэ, “харизмалаах”, “эмоциялаах”, о.д.а. хаачыстыбалары ааттыахха сөп. Уонна, биллэн турар, идэҕэ толору сөп түбэһэр буолуохтааххын, — диэн санаатын үллэһиннэ.
Роман Николаевич, куонкурус педагог сайдарыгар өссө биир үктэлинэн буоларын, атыттар үөрэтэр ньымаларын, сатабылларын көрөн элбэххэ үөрэммитин бэлиэтиир.
“Сыл учуутала-2019” куонкуруска оскуола таһымынан, уопсайа, 451 учуутал кыттыбытыттан, 24 бастыҥ учуутал сүүмэрдэнэн кэлэн күрэхтэстэ. Биэс бастыҥнар кэккэлэригэр Роман Оконов (Уус Алдан улууһун Суотту оскуолатын историяҕа, обществознаниеҕа учуутала), Ольга Коваль (Нерюнгритааҕы 1-кы нүөмэрдээх оскуола нуучча тылын уонна литэрэтиирэтин учуутала), Николай Кучуров (Ньурбатааҕы тиэхиньиичэскэй лиссиэй технологияҕа учуутала), Владилен Москвитин (Нам улууһун Хамаҕаттатааҕы саха-французскай лиссиэй информатикаҕа учуутала), Иннокентий Бекянов (Чурапчы улууһун Арыылаах оскуолатын физикаҕа учуутала) киирдилэр.
Людмила ПОПОВА, “Саха сирэ” хаһыат, edersaas.ru