Сыл тахсар от 79 бырыһыана баар. Оттооһуҥҥа күрэхтэһии биллэрилиннэ!
Атырдьах ыйын 30 күнүнээҕи туругунан, 379 тыһ. 756 туонна от чөкөтүллэн, сыл тахсар от 79 бырыһыана хааччылынна.
Былааны толоруу
1. Киин, илин эҥээр уонна Бүлүү эргин улуустарга:
93 % — Cунтаар, 91 % — Бүлүү, 88 % — Ньурба, 86 % — Ленскэй, 84 % — Таатта, Үөһээ Бүлүү, 83 % — Кэбээйи, 79 % — Амма, Хаҥалас, 78 % — Чурапчы, 74 % — Өлүөхүмэ, 72 % — Мэҥэ Хаҥалас, Алдан, 71 % — Нам, Дьокуускай к., 67 % — Горнай, 64 % — Уус Алдан, 46 % – Жатай, 36 % — Мирнэй.
-
Хотугу улуустарга
98 % — Эдьигээн, 94 % — Орто Халыма, 82 % — Томпо, 81 % — Уус Маайа, 79 % — Дьааҥы, 76 % — Өймөкөөн, 64 % — Абый, 601 % — Үөһээ Халыма, 57 % — Эбээн Бытантай, 54 % — Өлөөн, 48 % — Муома, 21 % — Усуйаана, 20 % — Булуҥ, 16 % — Аллараа Халыма, 15 % — Аллайыаха.
Хаһаайыстыбалар сиилэһи угууга, бурдук хомууругар турунан эрэллэр. Санатан эттэххэ, быйыл саас бурдук 11 тыһ. 678 гектарга, сүөһү сиир култуурата 25 тыһ. 992 гектарга ыһыллыбыттара.
Оттооһуҥҥа күрэхтэһии биллэрилиннэ
Бэҕэһээ буолбут видеоконференцияҕа бырабыыталыстыба баһылыгын бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев оттооһуҥҥа өрөспүүбүлүкэтээҕи күрэхтэһии тэриллэрин эттэ. Күрэхтэһии икки зонанан араарыллан ыытыллар:
I зонаҕа – Амма, Мэҥэ Хаҥалас, Нам, Таатта, Горнай, Уус Алдан, Хаҥалас, Чурапчы улуустара уонна Дьокуускай куорат.
II зонаҕа – Үөһээ Бүлүү, Бүлүү, Өлүөхүмэ, Кэбээйи, Ленскэй, Ньурба, Сунтаар уонна Мииринэй улуустара.
Кыайыылааҕынан балаҕан ыйын 14 күнүгэр диэри оттооһун сүрүн көрдөрүүлэринэн ордук элбэх бааллаах улуустар ааҕыллыахтара. Баал олунньу 27 күнүгэр тахсыбыт Саха өрөспүүбүлүкэтин бырабыыталыстыбатын “2017 сылга ыһыы, оттооһун уонна хомуур үлэлэрин тэрийэн ыытыы миэрэлэрин туһунан” дьаһалынан бигэргэммит оттооһун былааныгар олоҕуран таһаарыллыаҕа. Былааны толоруу бырыһыана баалынан ааҕыллар (1 быраһыан = 1 баал). Өскөтүн бааллар тэҥнэһэр түбэлтэлэригэр, хамыыһыйа биир усулуобунай төбө ынах сүөһүгэ уонна сылгыга төһө аһылык единицата тиксэрин учуоттуоҕа. Түмүк балаҕан ыйын 24 күнүгэр таһаарыллыаҕа.
Бириистэр
I миэстэҕэ — «УАЗ Хантер» массыына.
II миэстэҕэ — «Синтай-220» дьоҕус тыраахтар.
III миэстэҕэ – компьютерной тиэхиньикэ кэмпилиэгэ.
Раиса СИБИРЯКОВА, “Саха сирэ” хаһыат, edersaas.ru