Маны аах Нацбырайыактар

Оскуолалар тутуллаллар

«Оҕолор куоракка дуу, тыа сиригэр дуу олороллоруттан тутулуга суох, хаачыстыбалаах үөрэҕи ылалларыгар, аныгы үйэ ирдэбилигэр эппиэттиир табыгастаах усулуобуйа тэриллиэхтээх. Федеральнай киин өйөбүлүнэн, туох-ханнык иннинэ «Үөрэх» национальнай бырайыагынан, өрөспүүбүлүкэбит бары муннугар оскуолалар тутуллаллар», — диэн бэлиэтиир Ил Дархан Айсен Николаев.

Балаҕан ыйыгар 220 оҕо үөрэнэригэр уонна 100 оҕо сылдьарыгар Хаҥалас улууһугар Өктөмҥө оскуола-уһуйаан тутуллубута.  Өлөөн оройуонугар Харыйалаахха 120 оҕо үөрэнэр, 75 оҕо сылдьар дьиэтэ дьэндэйбитэ. Бүгүн Таатта оройуонугар Кыйыга 90 оҕо үөрэнэр саҥа оскуолата аанын аста. Икки мэндиэмэннээх дьиэ уопсай иэнэ 2757 кв. м. Манна үөрэнэр кылаастары сэргэ, лабораториялар, мастарыскыайдар, остолобуой, медпуун, бибилэтиэкэ, успуорт уонна аактабай саалалар бааллар. Этээстэр рекреациялаахтар уонна төрөппүттэр оҕолорун кэтэһэллэригэр, сынньанар сирдэрдээхтэр. Оскуола таһыгар оҕолор сүүрэн-көтөн оонньуулларыгар уонна сынньаналларыгар, сэһэргэһэллэригэр былаһааккалардаах.
Сыл түмүктэниэр диэри Уус Алдан улууһугар Оҕуруоттаахха 220 миэстэлээх, Намҥа Кириэс Кытылга 220 үөрэнээччигэ интэринээттээх, 100 оҕо үөрэнэригэр уонна 45 кырачаан сылдьарыгар уһуйааннаах оскуола Үөһээ Бүлүүгэ Тамалакааҥҥа тутуллан бүтүөхтээхтэр.
Маны таһынан, Чурапчы улууһугар Килэҥкигэ 90/20 миэстэлээх, Эдьигээн оройуонугар Кыстатыамҥа 60/30 миэстэлээх оскуола-уһуйааннар тутууларын «Тыа сирин кэлим сайыннарыы» РФ судаарыстыбаннай бырагыраама үбүлээтэ.
Дьокуускайга Кангалаас микрооройуонугар 220/100 миэстэлээх оскуола-уһуйаан тутуллан бүтэн үлэҕэ киирэргэ бэлэм. Ньурба улууһугар Сайылыкка 60 оҕо үөрэнэр оскуолата МТ олохтоох бүддьүөт үбүнэн тутуллубута. 2022 сылга «Үөрэх» национальнай бырайыак иитинэн  Дьокуускай куорат 68-с түөлбэтигэр, өрөспүүбүлүкэҕэ саамай улахан, 990 оҕо үөрэнэригэр аналлаах оскуола тутуллар. Маны сэргэ, Уус Алдаҥҥа Бороҕоҥҥо 450 оҕо үөрэнэр уонна Кэбээйи улууһугар Сайылыкка 275 оҕо үөрэнэр кыһалара тутуллан үлэҕэ киирэллэрэ былааннанар. Үөрэнээччи ахсаана элбээбитинэн, уопсай үөрэхтээһин тэрилтэлэригэр эбии миэстэлэри тэрийэргэ саҥа бырайыак иитинэн,  Дьокуускайга 274 оҕо үөрэнэригэр 5 №-дээх, 326 оҕо үөрэнэригэр 12 №-дээх, 120 оҕо үөрэнэригэр Хатаска оскуолаларга эбии тутуулары түмүктүүрү былаанныыллар.

 

0
0
Telegram @edersaas20