Тыа хаһаайыстыбата

Сыл саҕаланыаҕыттан 532,6 туонна үүт ыанна

«Өлүөхүмэ кыладабыайа» хааччахтамыт эппиэтинэстээх уопсастыба Үҥкүрдээҕи пиэрмэтин сайылыгар былырыын ынаҕы ыыр саалы тутан үлэҕэ киллэрбитэ.

Быйыл сайын төһө да курааннаабытын үрдүнэн, пиэрмэ ыанньыксыттара үрдүк көрдөрүүнү ситистилэр. Ол курдук сыл саҕаланыаҕыттан пиэрмэ үрдүнэн 532,6 туонна үүт ыанна. Ити ааспыт сыл туһааннаах кэмин кытары тэҥнээтэххэ, 105,6 туоннанан элбэх.

– Биир фуражнай ынахтан ортотунан 2927 киилэ үүт ыанна, ол эбэтэр былырыыҥҥыттан 370 киилэнэн элбэх, – диир хаһаайыстыба сүрүн зоотехнига Светлана Слепцова.

Массыынанан ыаһын оператордара үүтү ыаһыҥҥа кыраапыктарын толорорун ааһан, куоһаран иһэллэр. Ол курдук, Лариса Давыдова 130,6, Людмила Нутчина 124, Людмила Копылова 115,3, Ольга Корнилова 106 туонна үүтү ыатылар. Ааспыт күһүн саҥа төрүүр тиҥэһэлэри туппут Ольга Давыдова 40 туоннаны ыабыта, бастакы төрүөх ынахтарга куһаҕана суох көрдөрүү буолар.

«Туймаада» агрохолдинг генеральнай дириэктэрэ Петр Ефремов хаһаайыстыба үлэтин-хамнаһын билсэр

Үҥкүр пиэрмэтин үлэһиттэрэ ынах ыыр саал үлэни быдан кудумсутарын бэлиэтииллэр, итини хаһаайыстыба салалтата үлэ дьонун туһугар ахсаабат кыһамньытын быһыытынан сыаналыыллар.

Быйыл хаһаайыстыба (генеральнай дириэктэр Василий Сафонов) дьоҕус буойунаны тутта сылдьар. Кэлэр өттүгэр Билкэйгэ ньирэй хотонун былаанныыр.

Өлүөхүмэттэн  Валерий Малышев.

0
0