Бүгүҥҥүттэн педагогтарга күүтүүлээх-кэтэһиилээх “Сыл иитээччитэ-2019” өрөспүүбүлүкэтээҕи X куонкурус саҕаланна. Быйыл Саха сирин 18 улууһуттан уонна 6 куораттан, уопсайа, 25 педагог кытта кэллэ.
edersaas.ru
Тэрийээччилэр иһитиннэрбиттэринэн, тоҕус сыл устата куонкуруска 170 иитээччи, эбии үөрэхтээһин педагога, муусука салайааччыта кыттыбыт.
Ыҥырыылаах ыалдьыт буолан кэлбит Арассыыйатааҕы “Сыл иитээччитэ-2018” куонкурус муҥутуур кыайыылааҕа, Химки куорат (Москва уобалаһа) уһуйаанын иитээччитэ Анастасия Шлемко: “Аны аҕыйах күнүнэн ким эрэ кыайыылаах аатын сүгүөҕэ. Саамай сүрүнэ – биир идэлээхтэргит уопутун үллэстэн, үлэҕитигэр эспиэрдэр сыанабылларын ылан биир үктэл үрдүкү тахсыаххыт. Ситиһиилээхтик кыттыҥ”, — диэн баҕа санаатын тиэртэ.
СӨ үөрэҕи сайыннарар уонна квалификацияны үрдэтэр институт дириэктэрэ Галина Алексеева: “Кыайыылаах биир эрэ буолар, кыайтардаххытына хомойумаҥ. Куонкурус кэмигэр элбэххэ үөрэниэххит, уопутуруоххут”, — диэн эттэ.
Бастакы күн кыттааччылар Бүтүн Арассыыйатааҕы “Сыл иитээччитэ-2018” куонкурус муҥутуур кыайыылааҕа Анастасия Шлемко маастар-кылааһыгар кытыннылар, “Тыйаатыр сылынан” сибээстээн, тэрээһин үөрүүлээх аһыллыытыгар бөлөҕүнэн арахсан кылгас көрдөрүүлэри туруордулар, талааннарын көрдөрдүлэр.
Түөрт күннээх куонкурус түмүгүнэн кыайыылаах үрдүк аатын сүкпүт педагог Арассыыйатааҕы “Сыл иитээччитэ” куонкуруска Саха сирин аатын көмүскүүр чиэскэ тиксиэҕэ.
Людмила ПОПОВА, “Саха сирэ” хаһыат, edersaas.ru