«Сыл дьиэ кэргэнэ-2020» өрөспүүбүлүкэтээҕи бэстибээл кыайыылаахтарын эҕэрдэлээтилэр. Тэрээһин куйаар ситиминэн ыытылынна.
«Улуустартан күөн күрэскэ кыттааччылар ахсааннара сыллата элбээн иһэр. Быйыл, 2020 сыл күрэһэ, ыраахтан олорон уонна кэтэхтэн кыттыынан ыытылынна. Күрэхтэһээччи ахсаана хаһааҥҥытааҕар да элбэх. Иккис түһүмэххэ 32 оройуонтан 86 дьиэ кэргэн кытынна. Холобур, 2019 сыллаахха күрэскэ 64 дьиэ кэргэн кыттыбыта. 2018 сыллаахха — 51 дьиэ кэргэн», — диэтэ СӨ Үлэҕэ уонна социальнай сайдыыга миниистирэ Елена Волкова.
«Үгэһи утумнуур дьиэ кэргэн – 2020» анал аат кыайыылаахтарынан Иван уонна Акулина Ануфриевтар (Чурапчы), «Тыа сирин ыала – 2020» анал аат кыайыылаахтарынан Виталий уонна Сахаайа Илюхиннар (Горнай), «Элбэх оҕолоох ыал – 2020» Сергей Егоров уонна Дина Дойдукова (Ньурба),
«Эдэр ыал – 2020» Валентин Горохов уонна Ирина Бодруг (Томпо), «Көс ыала – 2020» анал аат кыайыылаахтарынан Анатолий уонна Анна Поповтар (Анаабыр) буоллулар.
«Сыл дьиэ кэргэнэ — 2020» Арассыыйатааҕы күрэскэ «Эдэр ыал» анал аат кыайыылаахтарынан буолбут Герман уонна Елена Ивановтарга (Чурапчы) «Сыл ыала» Бүтүн Арассыыйатааҕы куонкурус Бочуоттаах диплома, Арассыыйа бастыҥ ыалларын Бочуоттаах кинигэтэ уонна ноутбук туттарылынна. Ону сэргэ, бука барыларыгар СӨ Үлэҕэ уонна социальнай сайдыыга министиэристибэтин аатыттан миэбэл ыларга сэртипикээттэр туттарылыннылар.
«Сыл дьиэ кэргэнэ» өрөспүүбүлүкэтээҕи күөн күрэс «Мин дьиэ кэргэним — мин өрөспүүбүлүкэм» девиһинэн, дьиэ кэргэн олоҕун сыаннаһын, кыһамньылаах, эппиэтинэстээх төрөппүт буолууну үрдэтэр соруктаах сыл ахсын ыытыллар. «Сыл дьиэ кэргэнэ — 2020» быйылгы тэрээһиҥҥэ 32 оройуонтан 86 дьиэ кэргэн кытынна. Кыайыылаахтарга сыл ахсын СӨ Ил Дарханын бириэмийэтэ туттарыллар.
+1
+1
+1
+1
+1
+1
+1