Саха сиригэр муус устар саҥатыгар, үгэс быһыытынан, “Сыл бастыҥ учуутала” өрөспүүбүлүкэтээҕи куонкурус түмүктүүр түһүмэҕэ саҕаланар.
Ол курдук, муус устар 2 күнүгэр Бырабыыталыстыба 2N-дээх дьиэтин аактабай саалатыгар өрөспүүбүлүкэ бары улуустарыттан 30-тан тахса чулуу учуутал муһунна. Бу күн “Сыл бастыҥ учуутала-2018” куонкуруска старт биллэрилиннэ.
Улуустарыгар кыайан-хотон кэлбит бастыҥтан-бастыҥ педагогтары СӨ үөрэхтээһиҥҥэ уонна наукаҕа миниистирин бастакы солбуйааччы Михаил Присяжнай эҕэрдэлээтэ: “Учуутал идэтэ —ураты идэ. Учуутал оҕоҕо ийэтин, аҕатын да тэҥэ буолуон сөп. Оскуолаҕа быһаччы үлэлии сылдьар дьон ону өйдүүллэр. Биһиги, талан ылбыт идэлэринэн айымньылаахтык үлэлиир педагогтары мэлдьи өйүүбүт”, — диэтэ кини.
Куонкурус түмүктүүр түһүмэҕин тэрээһин-тэхэньиичэскэй уонна методическай өттүнэн С.Н.Донской-II аатынан Үөрэхтээһини сайыннарар уонна квалификацияны үрдэтэр институт хааччыйар. Институт дириэктэрэ Галина Алексеева бэйэтин эҕэрдэ тылыгар «Сыл бастыҥ учуутала» — бу куонкурус эрэ буолбатах, бүгүн бу — учууталлар профессиональнай таһымнарын үрдэтэр, саҥа ааттары, бастыҥнары быһаарар былаһаакка буолар, диэн бэлиэтээтэ.
Сыллата куонкурус кыттыылаахтарын ахсаана улаата, географията кэҥии турар.
Үөрэх уонна наука министиэристибэтин пресс-сулууспата иһитиннэрэринэн, куонкурус бэйэтэ үгэс буолбут аһымал акциялардаах эбит. Ол курдук, быйылгы сыл акциятынан «Оживи рисунок» буолла. Манна, куонкурус кыттыылаахтара бука бары, Дьокуускай 34N-дээх Анал (коррекционнай) интэринээт-оскуолатын үөрэнээччилэрин уруһуйдарынан, баайан, биитэр тигэн, араас оонньуурдары бэлэмнээбиттэр. Бу оонньуурдарын учууталлар уруһуй ааптардарыгар бэлэхтиэхтэрэ.
Бастакы күҥҥэ педагогтар куонкурус сорудаҕынан “Мин — учууталбын” диэн эссе суруйдулар итиэннэ методическай семинарга кыттыыны ыллылар. Инникитин хас да күн кинилэри, ити курдук, араас интэриэһинэй сорудахтар күүтэллэр.
Куонкуруһу үөрүүлээхтик аһыыга миниистири солбуйааччылар Михаил Присяжнай, Эдуард Кондратьев уонна Юрий Семенов, бэйиэт Роберт Рождественскай «Учууталларга» хоһоонун ааҕан иһитиннэрдилэр итиэннэ куонкурус кыттыылаахтара-учууталларга ситиһиилэри баҕардылар.
Татьяна МАРКОВА, «Саха сирэ» хаһыат, edersaas.ru