Сылбыт түмүктэнэр чугааһата. 2016 сыл түмүгүнэн бастыҥ спортсменнарынан кимнээх буолуохтарын сөбүй? Cпортивнай суруналыыстар уонна Спорт министиэристибэтин анал хамыыһыйата ахсынньы саҥатыгар быһаарыаҕа. «Дьулурҕан» маннык спортсменнары бастыҥнарынан ааттыыр:
Ньургун Скрябин – Красноярскайга ыытыллыбыт көҥүл тустууга Иван Ярыгин аатынан норуоттар икки ардыларынааҕы Гран-при турнир кыайыылааҕа, Дьокуускайга буолбут Россия чөмпүйэнээтин боруонса призера.
Александр Чепиков – бильярд “комбинированнай пирамида” көрүҥэр Иркутскайга ыытыллыбыт Россия чөмпүйэнээтин кыайыылааҕа.
Айаал Лазарев – көҥүл тустууга Азия чөмпүйэнээтин боруонса призера, Астана ыытыллыбыт Азия континенын Олимпиадаҕа сүүмэрдиир күрэхтэһиитигэр үһүс миэстэлээх, Рио-де-Жанейро куоракка буолбут ХХХI сайыҥҥы Олимпийскай оонньуу кыттыылааҕа.
Виктор Лебедев – көҥүл тустууга Россия чөмпүйүөнэ, Иван Ярыгин аатынан Красноярскайдааҕы турнир 61 киилэҕэ боруонса призера, Рио-де-Жанейро куоракка буолбут ХХХI сайыҥҥы Олимпийскай оонньуу кыттыылааҕа.
Сардаана Трофимова – Уфаҕа ыытыллыбыт марафон дистанциятын аҥарыгар (21 км) Россия Кубогын кыайыылааҕа, Екатеринбурга буолбут “Европа-Азия” норуоттар икки ардыларынааҕы марафоҥҥа бастакы миэстэлээх. Россия олимпийскай сүүмэрдэммит хамаандатын чилиэнэ.
Матрена Ноговицына – Турция Измир куоратыгар буолбут 100 харахтаах дуобакка аан дойду чөмпүйэнээтигэр түргэн оонньууга бастакы миэстэлээх.
Розалина Тимофеева – оҕунан ытыыга Россия кубогар бастакы миэстэлээх, Венгрияҕа буолбут Европа кубогын уонна Румынияҕа ыытыллыбыт эдэрдэргэ Европа күрэхтэһиитин кыайыылааҕа.
Виктор Рассадин – көҥүл тустууга устудьуоннарга Россия уонна аан дойду чөмпүйүөнэ, Аан дойду Кубогар хамаанданан иккис миэстэлээх, Дьокуускайга буолбут Россия чөмпүйэнээтин үрүҥ көмүс призера.
Егор Пономарев – көҥүл тустууга Россия чөмпүйүөнэ, Д.П.Коркин аатынан норуоттар икки ардыларынааҕы турнир кыайыылааҕа, Минскэйгэ А.Медведь бирииһигэр аан дойдутааҕы турнир призера.
Доруобуйаларыгар хааччахтаах спортсменнарга
Степанида Артахинова – оҕунан ытыыга Европа чөмпүйүөнэ, биирдиилээн түмүккэ боруонса, хамаанданан ытыыга үрүҥ көмүс мэтээллээх. Блочнай оххо Россия чөмпүйэнээтин уонна Россия Кубогын кыайыылааҕа. Россия XV Паралимпиадаҕа сүүмэрдэммит хамаандатын чилиэнэ.
Анастасия Диодорова – көхсүнэн сытан эрэн харбааһыҥҥа Европа чөмпүйүөнэ, эстафетаҕа үһүс миэстэлээх. Россия XV Паралимпиадаҕа сүүмэрдэммит хамаандатын чилиэнэ.
Владимир Балынец – пауэрлифтиҥҥэ Россия Кубогын уонна Россия чөмпүйэнээтин кыайыылааҕа. Россия XV Паралимпиадаҕа сүүмэрдэммит хамаандатын чилиэнэ.
Спорт национальнай көрүҥнэригэр
Дмитрий Попов – Чолпон-Атаҕа (Кыргызстан) ыытыллыбыт көс омуктар норуоттар икки ардыларынааҕы оонньууларын мас тардыһыыга муҥутуур кыайыылааҕа. Екатеринбурга Россия муҥутуур кыайыылааҕын быһаарар күрэхтэһии иккис призера.
Анатолий Баишев – мас тардыһыыга Батумига буолбут Европа уонна Чолпон-Атаҕа ыытыллыбыт аан дойду чөмпүйүөнээттэрин кыайыылааҕа.
Туйаара Орлова – мас тардыһыыга Россия уонна аан дойду чөмпүйүөнэ. Россия муҥутуур кыайыылааҕын быһаарар күрэхтэһии кыайыылааҕа.
Ситиһии манан бүппэтэ буолуо дии саныыбын. Өссө да сэтинньи-ахсынньы ыйдарга спортсменнарбыт улахан таһымнаах күрэхтэһиилэргэ кытталлара былааннанар. Онно да ситиһиилэр баар буолуохтара диэн бүк эрэнэбин.