«Саха» НКИХ ханаалыгар быһа биэриигэ сыл бастыҥ спортсменнарын эттилэр. Санатар буоллахха, куоластааһын интэриэниэт нөҥүө «Спорт Якутии» саайтка ыытыллыбыта.
Хас биирдии анал аакка үстүү киһи туруоруллубута. Уопсайа 25 тыһыынчаттан тахса куолас киирбит диэн тэрийээччилэр эттилэр.
Спорт адаптивнай көрүҥнэригэр куоластааһыҥҥа охчут Степанида Артахинова, харбааччы Анастасия Диодорова, пауэрлифтер Владимир Балынец киирбиттэрэ. Манна 2020 сыл бастыҥ спортсменынан спорт үтүөлээх маастара Анастасия Диодорова буолла.
Спорт национальнай көрүҥнэригэр мас-рестлер Екатерина Белолюбская, многоборец Леонид Филиппов, хотугу многоборец Алексей Созонов турбуттара. Куоластааһын түмүгүнэн бастыҥынан Россия чөмпүйүөнэ Екатерина Белолюбская ааттанна.
Спорт олимпийскай көрүҥнэригэр боксер Василий Егоров, марафонец Сардаана Трофимова, тустуук Айаал Лазарев киирбиттэрэ. Кыайыылааҕынан норуоттар икки ардыларынааҕы кылаастаах спорт маастара, Россия чөмпүйүөнэ Сардаана Трофимова буолла! Оттон Олимпиадаҕа киллэриллибэтэх көрүҥнэргэ дуобатчыттар Андрей Федотов, Матрена Ноговицына, кикбоксер Вадим Колтовской икки ардыларыгар куоластааһын ыытыллыбытын түмүгэр, саамай элбэх куолаһы хомуйан норуоттар икки ардыларынааҕы кылаастаах гроссмейстер Матрена Ноговицына буолла.
Виктория БЯСТИНОВА.