“Сыл бастыҥ паарата” куонкуруска Айталина, Михаил Владимировтар кыайдылар. Бу куонкуруска алта паара күөн көрүстүлэр. Кинилэр үс нэдиэлэ инниттэн спортивнай, художественнай, психологическай уонна икки фотосессияны, барыта түөрт түһүмэҕи ааспыттара.
Финалга тахсыбыт пааралар визиткэлэрин – хайдах билсиспиттэрин, таптаспыттарын туһунан уратытык, бэрт айымньылаахтык көрдөрдүлэр. Салгыы бэйэ-бэйэлэрин төһө билэллэрин, өйдөһөллөрүн дакаастаатылар. Үһүс түһүмэххэ үҥкүүлээн дайдылар.
Айталина, Михаил Владимировтар роликтаах үҥкүүлээн, дьүүллүүр сүбэ сүрэҕин сүүйдүлэр. Кинилэр бу үҥкүүлэрин бэйэлэрэ толкуйдаан туруорбуттар.
Кыайыылаахтарга “Виктория” миэбэл салона 50 тыһ. солк. суумалаах сертификатын туттардылар. Ону тэҥэ “Золотое время” чаһы салона туруорбут бэлэхтэрин биэрдилэр.
Куонкурус кэмигэр Yes сыбаайба агентствота тэрийбит “Свадьба в подарок” бырайыак түмүгүн таһаардылар. Манна 60-тан тахса паара кыттыбыта. Кыайыылаахтарга сыбаайбаларын ыыталларыгар 200 тыһ. солк. туттардылар.
Ангелина Васильева, “Саха сирэ” хаһыат, edersaas.ru