Дьокуускайга оптуобус сылаас тохтобуллара элбээн иһэллэр.
Оптуобус сылаас тохтобулларыгар маршрутнай оптуобустар сырыыларын көрдөрөр монитордар, иһирдьэ тырааныспар хаартатын толорор терминаллар, пассажирдар олорор ыскамыайкалара бааллар.
– Куорат баһылыга Евгений Григорьев улуустары кытары бииргэ үлэлиир Сөбүлэһиини түһэрсэригэр сылаас тохтобулларга тыа хаһаайыстыбатын бородууксуйатын батарар дьоҕус маҕаһыыннары арыйарга этии киллэрбитэ, – диир куорат дьаһалтатын тас сибээскэ уонна инвестбырайыактарга департаменын салайааччы Владимир Аржаков. – Онуоха кинилэр аренда төлөбүрүттэн босхолоноллор, арай, уоту төлүүллэр уонна тохтобул иһин-таһын ыраастыыллар.
Быйыл куоракка үс сылаас тохтобул үлэҕэ киирдэ, олортон биирдэстэригэр Нам улууһун Хамаҕатта нэһилиэгин «Сүүрээн» бааһынай хаһаайыстыба ларега арыллан үлэтин саҕалаата. Сыл бүтүөр диэри 17 сылаас тохтобул, кэлэр сылга 20 сылаас тохтобул эбии киллэриллиэхтэрэ.
Раиса Сибирякова, «Саха сирэ», edersaas.ru