Эмиэ быстах билсиһии, көрсүһүү хобдох түмүктэммит. Бу сырыыга эмсэҕэлээччи — эр киһи.
Дьокуускай куорат полициятыгар биир киһи эрийэн, кини 12 тыһ. солк. сыаналаах суотабай төлөпүөнүн биир дьахтар көрдөрөн туран былдьаабытын (уорбутун) туһунан иһитиннэрбит.
Барыллаан быһаарыынан, бу киһи эдэр дьахтары кытта социальнай ситимнэринэн билсиһэн, кэпсэтэн, суруйсан, дьэ, илэ көрсүһэргэ быһаарыммыттар.
Онуоха баара дьахтара сыбыдаанньаҕа итирик туруктаах кэлбит. Уонна эр киһиттэн «кэпсэтиэм» диэн төлөпүөнүн уларсарыгар көрдөспүт. Туох да куһаҕаны сибикилээбэккэ турбут киһи, дьахтар төлөпүөнү ылаат, куотан хаалбытыгар соһуйан эрэ хаалбыт.
Ол да буоллар, өй булан, полицияҕа тута тыллыы охсон, дьахтар ориентировката бары сулууспаларга бэриллэн, сотору кэминэн уорбаланааччыны туппуттар — Хаҥалас улууһуттан төрүттээх, ханна да үлэлээбэт 28 саастаах дьахтар эбит.
Бу чахчынан «халааһын» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн