Бэҕэһээ, от ыйын 28 күнүгэр, Сыбаатайга Орто Халыма куораттан ЫБММ бөртөлүөтэ ойуур баһаарын умуруорууга доброволецтары, улуус дьаһалтатыттан баһаары утары анал тэриллэри, Орто Халыма куоракка олорор биир дойдулаахтар түмсүүлэриттэн, тэрилтэлэртэн гуманитарнай көмөнү аҕалла. Бу туһунан @srednekolymsk24 суруйда.
edersaas.ru
Ол курдук, гуманитарнай көмөҕө Сыбаатайтан төрүттээхтэр түмсүүлэрэ, «Аспект» маҕаһыын (Явловская А.П.), орто оскуола (директор Слепцова К.А.), ДЮСШ (директор Охлопков С.Р.), гимназия (директор Кузьмина К.П.), Копалина С.А., оскуолабыт 2016 с выпускниктара кыттыыны ыллылар. «Бу малы-салы ыытыы түбүгэр сүүрбүт-көппүт, землячествобыт түмсүүтүн салайааччыта Мария Ивановна Слепцоваҕа улахан махталбытын тиэрдэбит. Уопсай дьыалаҕа, нэһилиэкпит иэдээнигэр биир киһи курдук көмөлөспүт биир дойдулаахтарбытыгар, тэрилтэлэргэ, биирдиилээн дьоҥҥо өйөбүлгүт иһин дириҥник махтанабыт! Маны тэҥэ күннэтэ счетка көмөлөһүөн баҕалаах билэр да, билбэт да дьоммутуттан харчынан көмө киирэ турар. Бу барыта биһиги санаабытын күүһүрдэр, эрэлбитин үксэтэр! Эһиги баһаам көмөҕүтүнэн барыта этэҥҥэ ааһыа диэн бүк эрэллээхпит! Доруобай буолуҥ, дьоллоох буолуҥ!», — @srednekolymsk24 иһитиннэрдэ.
edersaas.ru