Ил Дархан Айсен Николаев өрөспүүбүлүкэ быйылгы бүддьүөтүн табыгастаахтык уонна көдьүүстээхтик туһаныыга аналлаах соруктары бигэргэттэ. Босхоломмут үбү коронавируһу утары үлэҕэ ыытарга сорудахтаата.
edersaas.ru
Билигин СӨ бырабыыталыстыбата бүддьүөт ороскуотун ааҕар-суоттанар. Ол курдук, бу сыл бүтүөр диэри министиэристибэлэр уонна бырабыыталыстыба тэрилтэлэрэ сыаналаах тэриллэри (мэдиссиинэ тэриллэриттэн ураты), массыыналары, миэбэли, компьютернай тэриллэри атыылаһара, ону таһынан былааннаммыт уонна капитальнай өрөмүөнү (саахал эбэтэр ыксаллаах быһыы содуллуттан тахсыбыттартан ураты) ыытара бобулунна. Култуурунай-маассабай тэрээһиннэр, өрөспүүбүлүкэ таһыгар айаннар эмиэ тохтотулуннулар.
2020 сыл ахсынньы 31 күнүгэр диэри биэдэмистибэ тэрилтэлэригэр истипиэндьийэҕэ, эмкэ уонна ыарыһахтары таһар тырааныспар төлөбүрүттэн уонна инфекцияны утары үлэлэртэн ураты хайысхаларыгар субсидия бэриллэрэ тохтотулунна.
Орто уонна дьоҕус урбаан тэрилтэлэрин өйүүргэ 500-600 мөлүйүөн суумалах көмө оҥоһуллара былааннанар. Туризм, ресторан, сынньалаҥ салаатыгар 2020 сыл устата нолуок ыстаапката 1 -5 % диэри түһүөҕэ.
Ньургуйаана Иванова, «Саха сирэ” хаһыат, edersaas.ru
Хаартыска интэриниэттэн