«Тамма» кэпэрэтиип астыыр сыаҕар Дария Романова уон алтыс сылын маастардыыр.
Кинини кытары манна лабараан Туйаара Анисимова, суоппар Геннадий Филиппов уонна оробуочай Анатолий Романов үлэлииллэр.
‒ Паары аҕыс диэки ыытабыт, – диир Дария Афанасьевна. – Сарсыарда 1 туонна 8 сэнтиниэргэ тиийэ үүтү тутабыт. Сүүрдүллүбүт күөх үүтү кыра төлөбүргэ ылаллар. Сүөгэйбитин пастеризациялаан баран, сойутар хаамыраҕа уурабыт уонна иккилии хоно-хоно арыылыыбыт. Биир сырыыга уонча дьааһык арыыны таптайабыт. Электроуот бардаҕына, дизель-генераторбыт абырыыр.
Кэпэрэтиип «Сбербаан» лизининэн ылбыт үүт таһар массыыналарын систиэрнэтэ икки аҥаардаах: 800 лиитэрэ киирэригэр үүт, 600 лиитэрэ киирэригэр эриллибит үүт кутуллар. Улуус тус сыаллаах муниципальнай бырагырааматынан 300 тыһыынча солкуобай көрүллүбүтүн, лизинг төлөбүрүн аччатыыга укпуттар. Хас да сыллааҕыта атыыласпыт контейнер рефрижератордарыгар арыыны, мууһу уураллар. Билигин үс хас туонна арыы ууруллан турар эбит.
Бу сыаҕы таһынан «Тамма» кэпэрэтиип бэкээринэ үлэлэтэр. Онно Акулина Зыкова уонна Светлана Федорова үтүө суобастаахтык үлэлии-хамсыы сылдьаллар, нэһилиэги сибиэһэй килиэбинэн хаачыйаллар. Кэпэрэтиип салалтата бэкээринэ дьиэтин уонна астыыр тэриллэрин эмиэ төһө кыалларынан өрөмүөннүүр, саҥардар баҕалаах.
Майаттан Аркадий Иннокентьев, «Саха сирэ», edersaas.ru