Бүгүн — Сылгыһыт күнэ!
Мин оҕо эрдэхпинэ улахан кыргыттар ыллыыр буолаллара:
Алааска мин ыаллыы холкуоспар
Аатырбыт сылгыһыт киһи баар.
Ол киһи хотойдуу хараҕар
Дууһабын туттардым быһыылаах…
Ол өрдөөҥү кэмнэртэн ыла, мин өйбөр сылгыһыт диэн сүрдээх хорсун, хотой курдук эрдээх сүрэхтээх киһи буолара иҥэн хаалбыт.
Кырдьыга даҕаны, биһиги Сахабыт сирин томороон тымныытыгар чахчы даҕаны тоҥтон толлубат, ириэнэхтэн иҥнибэт хорсун-хоодуот дьон сылгынан дьарыгыраллар. Кинилэр диэтэх дьон дьөһөгөй оҕотун ис сүрэхтэриттэн таптыыр буоланнар, бу ыарахан үлэҕэ ис сүрэхтэриттэн ылсан үлэлииллэр.
Сылгы барахсан наһаа өйдөөх харамай, саҥарбат эрэ буруйдаах. Бука, аахпыккыт буолуо “Ат хараҕа” диэн Данил Макеев кэпсээнин. Бу киһини сөхтөрөр уонна уйадытар дьикти иэйиилээхтик суруллубут кэпсээн. Үөрүөм иһин, бу айымньыга кэпсэнэр ат хаһаайынын прототиба — Мэҥэ Хаҥалас 2-с Баатара нэһилиэгин киһитэ Баһылай Шергин, аҕам үөлээннээҕэ, сэрии уонна үлэ бэтэрээнэ. Кини фроҥҥа бэйэлээх бэйэтэ бүөбэйдээбит, бииргэ үлэ бөҕөтүн үлэлээбит буулуурун көрсүбүтүн туһунан номох курдук кэпсииллэрин оҕо сылдьан истэр буоларым.
Билигин мин олорор бөһүөлэкпэр Хочоҕо сылгыны үҥэр таҥара оҥостон үйэлэрин моҥообут уонна билиҥҥи кэмҥэ сылгынан дьарыгырар дьон элбэхтэр. Бу кылгас суруйуубар кинилэртэн ойуччу тутан сылгы таҥаралаах Аҕа дойдуну көмүскүүр Улуу сэрии бэтэрээнэ, 20 — с кондепо байыаһа Никаноров Дмитрий Антонович туһунан ахтан ааһыахпын баҕарабын. Кини наһаа сэмэй, үлэһит киһи этэ. Уолаттарын Антону, Дмитрийи кыра эрдэхтэриттэн сылгы көрүүтүн ымпыгар — чымпыгар үөрэппитэ. Эдэр сылгыһыттарга настаабынньык быһыытынан сүбэтэ — соргута баһаам буолара. Бэтэрээн сылгыһыт билигин суох. Кини аатын ыччаттара үйэтитэллэр: сылын аайы Улуу Кыайыы күнүгэр Д.А. Никаноров кыргыттара Ирина, Наталья Никаноровалар “Кыайыыны уруйдуур хоһооннор” диэн хоһоон күрэҕин ыыталлар, бириистэри туруораллар.
Кырдьаҕас сылгыһыт дьыалатын оҕолоро, сиэннэрэ чиэстээхтик салгыыллар.
Сылгы биһиги, сахалар, баар-суох баайбыт-дуолбут, инники кэскилбит, үҥэр таҥарабыт. Сылгы барахсан баарын тухары саха сахатынан кэрэ буолуо, сандалыбыт астаах буолуо! Сыһыы — сыһыы аайытын сыспай сиэллээхпит сырыстын! Дьөһөгөй оҕотугар үҥэн-сүктэн, саха буолан сандаарыаҕыҥ, киһи буолан килбэйиэҕиҥ!
Елена Прокопьева, уопсастыбаннай кэрэспэндьиэн
Хаартыскаҕа: Д.А.Никаноров (хаартыска Н.Никанорова тиксэриитэ)