Киһи олоҕо үгүс дьон дьылҕатыгар үтүөнү оҥорбутунан сыаналанар.
edersaas.ru
Бу туһунан өрөспүүбүлүкэҕэ киэҥник биллибит салайааччы, уопсастыбаннай деятель, СӨ дьахтар түмсүүтүн Сойууһун бэрэссэдээтэлэ, СӨ норуотун хаһаайыстыбатын үтүөлээх үлэһитэ, Амма улууһун Бочуоттаах гражданина, Арассыыйа дьахталларын Сойууһун мэтээлин, Софья Сидорова аатынан Бочуот знагын,»Бочуот Знага» уордьан, «Найрамдал» Монгол Народнай Өрөспүүбүлүкэтин мэтээлин, «Үлэҕэ килибиэнин иһин» мэтээл хаһаайына Светлана Ефимовна Николаева олоҕун уонна үлэтин туһунан «Саха киэн туттар дьоно» сериянан тахсыбыт кинигэ сүрэхтэниитигэр мустубут дьон ахтыыларыгар бэлиэтээтилэр.
«Ханнык да дуоһунаска олордор, Светлана Николаева тус уонна уопсастыбаннай үлэлэригэр олус бэриниилээх патриот киһи быһыытынан төрөөбүт дойдута Саха сирэ, бэйэтин норуота сайдыытыгар дьоһуннаах кылаатын киллэрэн, чаҕылхай холобуру көрдөрбүтэ«,— диэн суруйар кинигэ аан тылыгар Ил Дархан Егор Борисов.
Кинигэни үбүлээбит «Амма улууһа (оройуона)» МТ дьаһалтатын баһылыга Николай Архипов: «Аммалар норуот хаһаайыстыбатын араас эйгэтигэр үрдүк таһаарыылаахтык үлэлээбит уонна билиҥҥи кэмҥэ үлэлии-хамсыы, айа-тута сылдьар оройуон социальнай-экономическай, култуурунай, духуобунай сайдыытыгар дьоһуннаах кылааты киллэрсибит биир дойдулаахтарбытынан киэн туттабыт», — диэн туран: «Учуутал. Лидер. Салайааччы. Сүбэһит. Эрэллээх доҕор. Бу тыллар биир чаҕылхай үлэһиккэ, үтүөкэннээх киһиэхэ Светлана Ефимовна Николаеваҕа дьиҥ-чахчы сыһыаннаахтар», — диэн суруйар.
Ил Түмэн дьокутаата Елена Голомарева кинигэҕэ «Улахан салайааччы, сирдээччи» диэн төбөлөөн, маннык ахтар: «Киһи, олох туһунан эппит тыллара өйгө сүппэттии хатаммыттар. Олох очурдара араас өттүттэн кэлэн киһини уолуталлар, соһуталлар, онуоха барытыгар бэлэм буолуохтааххын, саамай сүрүнэ — эрэли, олоххо тапталы, дьулууру ыһыктыа суохтааххын. Эн аттыгар эн таптыыр дьонуҥ баар, онтон ордук үрдүк дьол суох«.
Светлана Николаеваны «Мин духуобунай наставнигым» диэн өрүү киэн тутта ахтар СӨ Дьахталлар тэрилтэлэрин сойууһун бэрэссэдээтэлэ Анжелика Андреева.
— Мин Светлана Ефимовналыын 20 сыл устата бииргэ алтыһан үлэлээбит дьоллоохпун. Дьиктитэ баара, эдэр да, ытык кырдьаҕас бэтэрээн да кинини тэҥник «мин дьүөгэм» диэн этэр этибит. Кини оннук киһиэхэ барытыгар биир тэҥ сыһыаннааҕа. Кини миэхэ өрүү: «Эн дьон эйиэхэ хайдах сыһыаннаһыахтарын баҕараҕын да, хас биирдии киһиэхэ оннук сыһыаннас», — диэн сүбэлиирэ. Духуобунай наставнигым ити тылларын олоҕум суолдьута оҥостон кэллим. Светлана Николаева — Саха сиригэр дьахтар хамсааһынын чаҕылхай лиидэрэ. Кини биһиэхэ, бэйэтин үөрэнээччилэригэр өрүү этэрэ: «Дьахтар хамсааһынын историятын инники күөҥҥэ тутуҥ. Көлүөнэлэр ситимнэрин олох быыһымаҥ. Уруккута суох билиҥҥи суох, билиҥҥитэ суох кэлэр кэм суох», — диэн. Светлана Ефимовна кэриэһин толорон, аныгы көлүөнэ уопсастыбанньык-дьахталлара Саха сиригэр дьахтар хамсааһынын бэтэрээннэрин болҕомтобут киинигэр тутабыт, — диэн санаатын үллэстэр Анжелика Андреева.
Оттон «Лиидэр кыргыттар» өрөспүүбүлүкэтээҕи уопсастыбаннай тэрилтэлэрин салайааччы Нинель Малышева санаатын маннык тиэртэ:
— 2016 сыллаахха лиидэр кыргыттар форумнарыгар кыттарбар, 1996 сыллаахха Светлана Николаева салалтатынан СӨ Дьахталлар тэрилтэлэрин Сойууһун устааба бигэргэтиллэн, Саха сиригэр дьахтар хамсааһынын үлэтэ тэтимирбитэ диэн истибитим. Биһиги наставникпыт, Дьахталлар сойуустарын билиҥҥи салайааччыта Анжелика Андреева Светлана Николаеваны өрүү холобур оҥостон, көлүөнэлэри ситимниир үлэни күүскэ ыытар. Ол иһин да буолуо, биһиги сааспытыттан тутулуга суох, дьахтар хамсааһынын аныгы лиидэрдэрэ өрүү биир тыынынан, хайысханан сирдэтэн үлэлиибит. Светлана Ефимовна араас көлүөнэ дьахталлар бары биир ситимнээхтик үлэлээтэхпитинэ, барытын кыайарбытыгар кэскиллээх олугу уурбут эбит.
Светлана Ефимовна Николаева туһунан кинигэ бэрт дириҥ ис хоһоонноох биһирэмин СӨ Дьахталлар тэрилтэлэрин сойууһун Бочуоттаах бэрэссэдээтэлэ, СӨ норуотун хаһаайыстыбатын үтүөлээх үлэһитэ Валентина Кириллина, «Амма улууһа (оройуона)» МТ дьаһалтатын баһылыгын солбуйааччы Прасковья Емельянова уонна СӨ Дьахталлар тэрилтэлэрин сойууһун бэрэссэдээтэлэ Анжелика Андреева тэрийэн ыыттылар.
2005 сыллаахха олохтоммут «Саха сирин киэн туттар дьоно» сериянан тахсыбыт кинигэҕэ Светлана Николаева олоҕун, үлэтин туһунан бэчээккэ тахсыбыт ыстатыйалар, интервьюлар, бииргэ алтыһан үлэлээбит дьонун-сэргэтин, чугас дьонун, уруу-хаан аймахтарын истиҥ ахтыылара түмүллэн киирдилэр.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.