Сүрүн Уопсастыба

«Свеча памяти» аахсыйаҕа 10 тыһыынчаттан тахса киһи кытынна

Ыам ыйын 7 күнүгэр Дьокуускайга Кыайыы болуоссатыгар үгэс буолбут “Свеча памяти” аахсыйа икки сыл тохтуу сылдьан баран, ыытылынна.

Аахсыйаҕа бырабыыталыстыба бэрэссэдээтэлин солбуйааччы Ольга Балабкина, Ил Түмэн бастайааннай кэмитиэтин бэрэссэдээтэлэ Виктор Губарев, ыччат миниистирэ Петр Шамаев, Дьокуускай аҕа баһылыга Евгений Григорьев, Гордума бэрэссэдээтэлэ Альберт Семенов, тыыл бэтэрээнэ, өрөспүүбүлүкэтээҕи Бэтэрээннэр сэбиэттэрин бочуоттаах  бэрэссэдээтэлэ Будимир Слепцов, дьокутааттар, уо.д.а. кыттыыны ыллылар.

— Кыайыы күнэ биһиэхэ барыбытыгар ол ааспыт уот сэрии сылларын санатар. Биһиги билигин маннык ыар сыананан кыайыллыбыт нацизм иккистээн кэлэрин көҥүллүө суохтаахпыт. Саха сирэ бу туһугар олус ыарахан сыананы төлөөбүтэ. Ону өйдүөх тустаахпыт. Манна оҕолор бааллара, кыттыыны ылаллара олус үчүгэй. Оҕолорбут уонна кинилэр оҕолоро өйдүүллэрин, билэллэрин тухары Кыайыы күнэ биһиги дойдубутугар саамай сүрүн, улахан бырааһынньыкпыт буола туруоҕа, — диэн Евгений Григорьев эттэ.

Аҕа дойдуну көмүскүүр Улуу сэриигэ биһиги дойдубут 27 мөлүйүөнтэн тахса киһитин сүтэрбитэ. Саха сириттэн кыргыһыыга 30 тыһыынча кэриҥэ буойун охтубута, тыылга хоргуйууттан, аас-туор олохтон 70 тыһыынча кэриҥэ киһи сырдык тыына быстыбыта. Ол курдук, сэрии сылларыгар Сахабыт сирэ хас төрдүс олохтооҕун сүтэрбитэ. Маннык улахан сүтүк атын ханнык да эрэгийиэҥҥэ тахсыбатаҕа. Бүгүн биһиги Арассыыйа олохтоохторун кытары бииргэ Улуу Кыайыы 77 сылын бэлиэтиибит уонна кыргыһыыга охтубут буойуннары, күнүстэри-түүннэри тыылга үлэлээн, олохторун толук уурбут дьоммутун кэриэстээн, чүмэчи уматабыт, — диэн Будимир Слепцов тыл эттэ.

Волонтердар ыстакааннаах чүмэчилэри, Георгиевскай лиэнтэлэри, гвоздика сибэккилэри түҥэтэллэр. Артыыстар Кыайыы ырыаларын толороллор. Хараҥаран барда. Болуоссакка “Помним!” диэн сүүнэ буукубалар уотунан суруллан, сандаара умайан бардылар. Дьон бэйэ-бэйэлэригэр мэһэйдэспэккэ эрэ кэлэн, оргууйдук чүмэчилэрин уураллар, хаартыскаҕа түһэллэр. Элбэх ыччат баар, үгүстэр дьиэ кэргэнинэн кэлэллэр, оҕолорун илдьэ сылдьаллар. Кырачааннарга, бука, төрөппүттэрэ бу аахсыйа туһунан кэпсээн эрдэхтэрэ. Дьиэ кэргэҥҥэ бу патриотическай иитии биир көрүҥэ буолар. Бэл, кэлээскэҕэ олорор инбэлиит уолаттар чүмэчилэрин ууран, сүгүрүйэн, кэриэстээн ааспыттарын хайгыы көрдүм.

Ангелина Васильева, “Саха сирэ” хаһыат, edersaas.ru

Хаартыска: ааптар түһэриилэрэ.

0
0
Telegram @edersaas20