Уһук Илиҥҥэ аан бастакытын Дьокуускайга иһэрдиигэ (сварка) квалификацияны сыаналааһын киинэ арылынна. Манна сварщиктар идэлээх таһымнарын үрдэтиигэ тургутугу ааһыахтарын, сатабылларын сайыннарыахтарын сөп. Саҥа киин Дьокуускайдааҕы индустриально-педагогическай колледж иһинэн тэрилиннэ. Боломуочуйалааҕынан Өрөспүүбүлүкэ нэһилиэнньэтин дьарыктаах оҥорууга кэмитиэт ананна. edersaas.ru
Атыы-бырамыысаланнас балаататын бэрэсидьиэнэ Владимир Членов эппитинэн, маннык киин Саха сиригэр олус наада. «Маннык киин арылларын өр күүттүбүт. Аны атын эйгэҕэ тэриллиэхтэрэ. Олох хаачыстыбатын намыһаҕа үлэһиттэр идэлэрин таһымын мэктиэтэ. Оробуочай идэлээхтэр аан дойду ирдэбилигэр эппиэттиир буолуохтаахтар. Бу кииҥҥэ былаас болҕомтолоохтук сыһыаннаһан, элбэх үбү-харчыны угуон наада«, — диир кини.
Идэҕэ стандартары киллэрии быйыл от ыйын 1 күнүттэн саҕаламмыта.
СӨ нэһилиэнньэтин дьарыктаах оҥорууга кэмитиэтин бэрэссэдээтэлэ Степан Москвитин:
— Идэлээх иһэрдээччилэр сатабылларын таһымын үрдэтиигэ бу киин улахан төһүү күүс буолуоҕа. Тургутукка теорияҕа боппуруостар уонна практическай сорудахтар киирэллэр. Ыарахан. Сварщик муҥутуур таһыма — алтыс. Алтыс разрядтаах сварщик ыарахан объектарга үлэлиир кыахтанар.
Николай Попов, «Саха сирэ» хаһыат, edersaas.ru