Ааспыкка Таатта улууһун Ытык Күөлүгэр хачыгаарынан үлэлиир Светлана Сайфуллина туһунан суруйбуппут. Аны бу сырыыга Ытык Күөлгэ сварщигынан өр сылларга үлэлээбит Изабелла Слепцова туһунан кэпсиибит.
https://edersaas.ru
Изабелла Георгиевна сотору 65 сааһын бэлиэтиэхтээҕин туһунан «ОДьКХ» ГУП үлэһиттэрэ кэпсииллэр. Кини билигин даҕаны сыбааркалыыр аппараатыттан арахсар санаата суох. Ытык Күөл олохтоохторо Изабелла Георгиевнаны бары билэллэр. Ол курдук, дьиэлэрин ситимин тартараары үгүс ыал кини өҥөтүн туһанаары гынар эбит. Олус хаачыстыбалаахтык сыбааркалыырын бэйэ-бэйэлэриттэн истиһэн эрдэхтэрэ.
– Биһиги саҕана үгүс кыыс быраас, учуутал буолуон баҕарара. Мин 1971 сыллаахха 1 №-дээх СПТУ-га сантехник идэтигэр докумуоммун туттарбытым, – диэн Изабелла Георгиевна кэпсиир. – Үөрэххэ туттарсыы хамыыһыйатын сэкирэтээрэ «Эн наһаа кыраҕын дии, сантехниктыыр кыаҕыҥ суох. Онон дьыалаҕын сварщик идэтигэр туттарарыҥ ордук этэ», – диэбитигэр, ону истээччи буолан, докумуоммун онно биэрбитим. Бөлөхпүтүгэр кыргыттар 11 этибит, үгүс кыыс ситэри үөрэммэккэ бырахпыта.
Бастаан утаа геологическэй экспедицияҕа
Эдэркээн кыыс үөрэҕин бүтэрээт, геологическэй-устар экспедицияҕа электро-газосварщигынан анаммыта. Онно кини сүрүн эбээһинэһинэн буурдуур тэрили көрүү-истии этэ. Итиннэ үчүгэй быраактыканы ааспыт буолан, гарааска үлэҕэ ананан, эр дьонтон итэҕэһэ суох сыбааркалыыр, үлэлиир буолбута. Ол курдук, тимир көлө араас чаастарын төһө баҕарар иһэрдэн сыбааркалыыра. Эр дьон кэллиэгэлэрэ бастаан утаа кинини истэригэр улаханнык ахсарбатахтар, өссө сорохтор сотору икки атаҕынан куотуо диэн күлүү гыммыттар.
Гарааска үлэлии түһэн баран, Тааттатааҕы «ОДьКХ» ГУП филиалыгар сварщигынан ыҥырбыттарыгар тута сөбүлэһэн, бочуоттаах сынньалаҥҥа тахсыар диэри таһаарыылаахтык үлэлээбитэ.
– Биллэн турар, дьахталлар курдук сирэйбин оҥостуохпун, дьэрэкээн былаачыйа кэтэн киэргэниэхпин баҕарарым ханна барыай, баар этэ. Сварщик үлэтигэр хайдах сирэйгин оҥостуоххунуй, тута ньамах буолар. Хайдах хараххын кырааскаланыаххыный? Эгэ, былаачыйа кэтиэҥ үһү дуо? Суох буоллаҕа дии, – диэн Изабелла Георгиевна истиҥник күлэн кэбиһэр.
Изабелла Слепцова бу идэни талбытыттан адьас кэмсиммэт эбит. «Сыбаарка үлэтэ олус интэриэһинэй ээ. Ювелирнай туттууну эрэйэр үлэ. Биллэн турар, сороҕор ыарахан да буолан ылааччы. Күнү быһа сыбааркалыыр, сытыы уоту көрөн тахсыы олус сылаалаах, илистиилээх үлэ. Ичигэс сиргэ үлэ курдук буолуо баара дуо? Кыһын тымныыга тоҥуу-хатыы, тоҥ турбалары сосуһуу манан аҕай дьыала буолбатах. Ол гынан баран, үлэлиирим тухары хаһан даҕаны өллүм-быһынным диэн тыллары биири даҕаны быктарбатаҕым», – диир уопуттаах сварщик.
Изабелла Георгиевна түөрт оҕону күн сиригэр көрдөрөн улаатыннартаата, билигин түөрт сиэн амарах эбээтэ. Түөрт оҕотун төрдүөннэрин сыбааркалыырга үөрэппитэ билигин олохторугар элбэҕи туһалаабыт. Аны билигин сиэннэрин сыбааркалыырга үөрэтэр санаалаах эбит.
Изабелла Георгиевна дьарыга элбэх, иистэнэрин сөбүлүүр, оҕуруо тиһэр. Саамай таптыыр дьарыгынан тимиринэн араас скульптуралары, тэриллэри оҥоруу. Урут оҕолоро сэлиэнньэ үрдүнэн саамай үчүгэй пулемет оонньуурдаахтар эбит. Билигин үйэ уларыйан, сиэннэригэр тимиринэн роботтары оҥорон биэртэлээбит.
Түгэнинэн туһанан, «Саха сирэ» хаһыат эрэдээксийэтин кэлэктиибэ Изабелла Георгиевнаны 65 сааскынан итиитик-истиҥник эҕэрдэлиибит! Дьолу-соргуну, ыстаал курдук кытаанах доруобуйаны баҕарабыт!
Александр ТАРАСОВ, «Саха сирэ» хаһыат, https://edersaas.ru