Сайтпытыгар бэҕэһээ, ыам ыйын 21 күнүгэр, иһитиннэрбиппит курдук, Дьокуускай куорат федеральнай суута Ил Түмэн урукку дьокутаата Николай Румянцев дьыалатын силиэстийэлээн бүтэрбитэ. Сууттанааччыга бүтэһик тыл бэриллибитэ. Бүгүн бу айдааннаах дьыалаҕа бириигэбэр таҕыста.
Санатар буоллахха, суут силиэстийэтин кэмигэр эмсэҕэлээччилэр, кинилэр интэриэстэрин көмүскүүр адвокат, сууттанааччы, кини адвокаттара бары «өрүттэр эйэлэспиттэринэн, дьыаланы сабарга» диэн үс төгүл хадатаайыстыба киллэрэ сылдьыбыттарын, суут өйөөбөтөҕө.
Судаарыстыбаннай буруйдааччы (борокуруор) Николай Румянцевы 4 сыл 6 ыйга көс-холуонньаҕа көҥүлүн уонна үс сылга массыына ыытар быраабын быһарга туруорсубута.
Өрүттэр киирсиилэрин кэмигэр эмсэҕэлээччилэр уонна кинилэр адвокаттара сууттан Румянцевы көҥүлүн быспатыгар көрдөспүттэрэ.
Оттон сууттанааччы адвокаттара уонна Николай Румянцев кини дьайыыларыгар буруйу оҥоруу састааба суоҕунан, быыһыыр бириигэбэр таһаарарыгар көрдөспүттэрэ.
Суут Николай Румянцевы РФ Холуобунай кодексатын 264- с ыст. 4-с чааһынан, ол эбэтэр, суол быраабылатын кэһэн, массыынаны итирик туруктаах ыытан, сэрэҕэ суохтан киһини өлүүгэ тиэрдиигэ буруйдааҕынан билинэн, 3 сыл 6 ыйга көс-холуонньаҕа көҥүлүн быһарга уурда. Манна эбии үс сыл устатыгар массыына ыытар быраабын быста.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Бу дьыала туһунан сиһилии «Саха сирэ» хаһыат ыам ыйын 30 күнүнээҕи нүөмэригэр ааҕаарыҥ.
Вера Макарова, «Саха сирэ» хаһыат, edersaas.ru
Хаартыскаҕа: суут силиэстийэтин кэмигэр.
Ааптар түһэриитэ.