Сууттар дьиэлэригэр киирдэххэ, аан бастакынан кинилэр көрсөллөр. Кэлбит киһи докумуонун, суумкатын иһигэр туох баарын, бэйэлэрин анал тэриллэринэн сууралаан бэрэбиэркэлииллэр. Кинилэр кимнээхтэрий? Суут дьиэлэригэр бэрээдэги көрөр бириистэптэр.
Ол суут дьиэтигэр киирээккин, саҕаланар – суумкаҕын арыйан көрдөрөҕүн, бэйэҕин баскыттан атаххар диэри анал тэрилинэн бэрэбиэркэлииллэр. Баҕар, бобуулаах маллары киллэрэн эрэриҥ буолуо дии? Оннук малларга киирэллэр: саа-саадах, сэп-сэбиргэл, бэстилиэт бары көрүҥэ, быһахтар, атын да уһуктаах маллар, боеприпастар, дэлби тэбэр тэриллэр, наркотик, туймаардар булкааһыктар, түргэнник умайар уматыктар, аэрозоллар, дьааттаах, химическэй убаҕастар.
РФ Суут бириистэптэрин федеральнай сулууспатын Саха сиринээҕи управлениетын пресс-сулууспата иһитиннэрбитинэн, ааспыт нэдиэлэҕэ Дьокуускай куорат сууттарын дьиэлэригэр (мировой сууттарга эмиэ) кэлбит дьон 14 бобуулаах малы киллэрэ сатаабыт: 9 быһаҕы, 1 гаас баллонун, 1 травматическай бэстилиэти, 2 боеприпаһы уонна 1 умайар убаҕас веществоны.
Итинник маллары киллэрэ сатааһын иһин эппиэтинэс араас буолар. Аҕалбыт киһи ити мал киниэнэ буоларын туоһулуур докумуоннаах (холобур, бэстилиэккэ, атын сэпкэ-сэбиргэлгэ) буоллаҕына, суут дьиэтигэр киллэрбэттэр. Оттон ол докумуонун болдьоҕо ааспыт эбэтэр ончу да суох буоллаҕына, бу киһини полицияҕа туттараллар. Бэрэбиэркэлээһин түмүгэр, кинини административнай биитэр холуобунай эппиэккэ тардаллар. Итинник ирдэбил, биллэн турар, наркотикка эмиэ сыһыаннаах.
Санатан эттэххэ, итини таһынан, суут саалатыгар суотабай төлөпүөнү туттуу, видеокамераҕа устуу, хаартыскаҕа түһэрии эмиэ бобуллар. Биһиги, суруналыыстар, эрдэттэн сайабылыанньа суруйан, судьуйа көҥүллээтэҕинэ эрэ, туттабыт. Суут мунньаҕын кэмигэр онтон атын да быраабыла, бобуу-хааччах элбэх, ону судьуйа бэйэтэ быһааран биэрэр. Суут приставтара буоллар, хас хамсаныыгын кыраҕытык кэтииллэр. Бэрээдэги кэһэр дьону бастаан сэрэтэн баран, ону истибэккэ аһара бардаҕына, суут саалатыттан таһаараллар, бэл диэтэр, административнай боротокуол толоруохтарын сөп.
Биһиги корр., «Саха сирэ» хаһыат, edersaas.ru
Хаартыска: РФ Суут бириистэптэрин федеральнай сулууспатын Саха сиринээҕи управлениетын пресс-сулууспата