Ньурбаҕа өрөспүүбүлүкэтээҕи инбэлиит уонна кыахтара хааччахтаммыт оҕолорго аналлаах реабилитационнай киин урукку салайааччытыгар суут уурааҕа тахсыбыт.
Суут быһаарбытынан, бу дьахтар ити үөһэ этиллибит тэрилтэ дириэктэрин солбуйааччытынан үлэлиир кэмигэр, 2016 сыл алтынньы ыйыгар, төрөппүт кыыһын сымыйанан («фиктивнэй») үлэҕэ ылбыт — санитарканан. Ол кэнниттэн бэйэтэ сотору кэминэн бу киин дириэктэринэн анаммыт.
Кыыһа, биллэн турар, биир да күн санитарканан үлэлээбэтэх, ол эрэн, хат кэмигэр, төрөөн баран уонна оҕотун көрөн олорор кэмигэр төлөнөр харчыны — 162 тыһ. солк. тахса суумманы — барытын ылбыт.
Бу холуобунай дьыала Ньурба борокуратууратын бэрэбиэркэтин матырыйаалларыгар олоҕуран тэриллибит.
Суут бу дьахтары кыра саастаах оҕолооҕун, үчүгэй характеристикалааҕын учуоттаан, 2 сылга көҥүлүн быһары усулуобунайынан ааҕан, 1 сыл тургутар болдьоххо уурбут.
Бириигэбэр сокуоннай күүһүгэр киирэ илик.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн