Саргылаах Саҥа дьылбыт салаллан кэлэрэ аҕыйах хонук хаалла. Эдэрдиин-эмэнниин, кырачаанныын-улаханныын мөһүүрэнэн күлүмүрдүүр, чыпчылыҥныыр-мичилиҥниир, күлүм аллар харыйаттан, кытарбыт муруннаах, бөлүөхсүбүт саҥалаах Тымныы Оҕонньортон, тэтэркэй имнээх, тэбэнэттик тэһэ көрбүт сиэнэ кыыс Хаарчаанаттан туох эрэ дьиктини-дьээбэни кэтэһэр, үөрдэр-көтүтэр алыптаах остуоруйа бырааһынньык!
Уһуйааҥҥа улахаттар бөлөхтөрүгэр сылдьар, атыннык туттар-хаптар, номнуо ааҕар-суруйар, ахсааны да суоттуур, сымарпуонун талкыйарыттан соло буолбат, эдьийдэрин-убайдарын нуобуктарын, көмпүүтэрдэрин хаһан айдааны тардар тоспооруйбут сиэним, Ньургуйаанам, сарсын уһуйааныгар Саҥа дьыллаары бэлэмнэнэр. Икки киэһээ дьиэбит иһэ ааранан атылыйыа дуу, мастарыскыай дуу курдук буола сырытта. Кыргыттар ийэлэрин кытта кырыйан, тигэн тирилэтии. Эр дьон эрбээн, иэҕэн, тоһоҕолоон-сурууптаан, кырааскалаан-уруһуйдаан үлэ бөҕө. Аныгы ойуулуктарга көрдөрөр киһи икки, кыыл икки ардынан, туох эрэ хаппыт диэн ааттыыр сүрдээх маскараат буолла. Сиэним кэтэн көрө-көрө астынар, эргичис-кулахачыс гына-гына туох эрэ диэн омуктуу саҥарталаан, ыһыытаан-хаһыытаан, тэбиэлэнэн-охсуоланан ылар. Ол сылдьан, быраатын, мурун бүөтэ киһибитин Аскалуончигы, тиэрэ тэбэн кэбиһэн ытатан-сарылатан, айдаан-моргуор, буойсуу-хаайсыы бөҕө буола сырыттыбыт.
Хата бу киэһээ, Ньургуйаанчыкпыт дуоспуруннанан олорон, мин көрдөхпүнэ, хортуон лоскуйугар тугу эрэ суруйан бооччойор. Кыҥнаҥныыр, сүүсчээнин тарбанар. Өөр баҕайы иһийэн, биир сири одуулаан олорор, эмискэ тэһэ астарбыт курдук салгыы суруйбутунан барар. Интэриэһиргээн тугу суруксуттуурун туоһулаһан, кэтэҕиттэн имэрийэн, минньигэсчээн киһибин сыллаан ыллым.
– Тымныы Оҕонньорго миэхэ Саҥа дьылга былансыатта бэлэхтээ диэн сурук суруйабын. Сарсын сарсыарда уһуйааммар харыйа анныгар ууруоҕум, – сиэним суругун уунар. Хортуоҥка диэн тутан көрөн баран, соһуйуу бөҕөнү соһуйдум:
– Хайаа, Ньургуйаанаа, ыраас кумааҕы суох үһү дуо, бу тоҕо суус кумааҕыга суруйдуҥ? – бэккиһээммин ыйыттым.
– Ээ, Тымныы Оҕонньор былырыын холуочуйан баран сурукпунан мээһэтин соттубут этэ. Ол иһин ити анаан-минээн ньулуопка суус кумааҕыга суруйдум. Дьэ, хайыыр эбит, билиллиэ, – Ньургуйаанам күлэн чаҕаарыйа-чаҕаарыйа суус кумааҕытын бүк тутан, баатыманынан кырыйан, килиэйдээн бэлэмнээбит кэмбиэригэр уган кэбистэ.
Дьэ, эмиэ Саҥа дьыллааҕы көр-күлүү диэтэҕиҥ. Сиэнчээним оҕуруктаах өйүн-мэйиитин сөҕөн эрэ кэбистим.