РФ Росгвардиятын Саха сиринээҕи управлениетын харабыллааһын отделын полицейскайдара суукка иһигэр уорууга сыһыаннаах икки буруйу арыйдылар. Бу туһунан управление пресс-сулууспата иһитиннэрдэ.
Бастакы уоруу Дьокуускай куорат Б.Чижик уулуссатыгар турар дьиэ тэлгэһэтигэр тахсыбыт. Биир 27 саастаах уолтан 15 тыһ. солк. сыаналаах «Мейзу» суотабай төлөпүөнүн уорбуттар.
Росгвардия полицейскайдара уонна полиция оперативниктара уорууга уорбаланааччылары ир суолларын ирдээн, тоҥ суолларын тордоон, бу буруйу «сылааһына» арыйдылар — иккиэн 40-ча саастаах, биирэ урут уорууга түбэһэн сууттана сылдьыбыт, иккиһэ ыар буруйу оҥорон сууттаммыт дьон эбит.
Ити уоруу кэнниттэн икки чаас буолан баран, аны Марха сэлиэнньэтиттэн иһитиннэрии киирбит — Покровская уулуссаҕа турар дьиэ хоспоҕун түннүгүн алдьатан киирэн, кимнээх эрэ уора сатаабыттар.
Полиция холуобунай ирдэбилин оперативниктара уорбаланааччылар кимнээҕин быһааран, кинилэр ориентировкаларын тарҕаппыттар. Уорбаланааччылары аҕыйах чаас иһинэн росгвардеецтар туппуттар. Биирдэрэ Ньурбаттан төрүттээх 33 саастаах, урут уорууга түбэһэн сууттана сылдьыбыт киһи, онтон иккиһэ Уус-Алдантан төрүттээх 35 саастаах киһи. Ханна да үлэлээбэт, олорор дьиэтэ-уота суох дьон.
Бу чахчыларынан «уоруу» ыстатыйанан холуобунай дьыалалар тэрилиннилэр.
Биһиги корр., «Саха сирэ» хаһыат, edersaas.ru
Хаартыска: РФ Росгвардиятын Саха сиринээҕи управлениетын пресс-сулууспата.