Дьокуускай куоракка ыалдьыбыт дьон ахсаана аҕыйаан эрэр, ол оннугар улуустарга элбээн иһэр эбит.
Эбээн Бытантай улууһугар үөскээбит балаһыанньаны быһаарарга Доруобуйа харыстабылын министиэристибэтин бириигэдэтэ барда, Мэҥэ Хаҥалас, Хаҥалас, Нам, Чурапчы улуустарын балаһыанньата хонтуруолга сылдьар диэн брифинг кэмигэр суһал ыстаап салайааччытын солбуйааччы Ольга Балабкина иһитиннэрдэ.
Дьокуускайга “Триумфка”, Мииринэйгэ оҕо спортивнай комплексын баазатыгар, Мэҥэ Хаҥаласка икки нэһилиэккэ, поликлиникаларга уһун уочарат буолбатын, түргэнник тест оҥорон ыалдьыбыт дьону булар туһугар эбии амбулаторнай пууннар аһыллыбыттарын эттэ.
“Коронавирустан быһыы дьайыытын болдьоҕо 6 ый диэн сүбэлииллэр. Күн бүгүн 127 322 киһи ревакцинацияны ааста. Бу хаттаан быһыыны ылыытын болдьоҕо кэлбит дьонтон 62 бырыһыана буолар.
Оҕолору тэйиччиттэн үөрэххэ көһөрүү, элбэх киһи биир сиргэ мустубатын диэн быһаарыы ылыллар. Онон оҕолор уопсастыбаннай миэстэлэргэ сылдьалларын төрөппүттэр хонтуруоллааҥ. Суукка устата ыалдьыбыт дьонтон 21-рэ оҕо. Уопсайынан, өрөспүүбүлүкэ үрдүнэн балыыһаҕа сытар дьонтон 30-ча бырыһыана оҕо аймах” – диэн кэпсээтэ.
Ааспыт суукка устата 3314 киһи ыалдьыбыт, коронавирус диагностаах 123 киһи балыыһаҕа киирбит, 1521 киһи үтүөрбүт.
“Саха сирэ” хаһыат, edersaas.ru
Хаартыска: montsame.mn