Ыам ыйын 27 күнүнээҕи туругунан, өрөспүүбүлүкэҕэ 196 084 устуука вакцина кэлбититтэн, 78,1%-на дьоҥҥо бэриллибит. Барыта 152 952 киһи быһыыны ылбыт.
Нерюнгри, Алдан, Үөһээ Бүлүү, Ньурба, Амма, Мэҥэ Хаҥалас улуустарыгар вакцинация хаамыыта үчүгэй. Ол курдук, өрөспүүбүлүкэҕэ суукка иһигэр 5093 киһи коронавируснай инфекцияны утары быһыыны ылбыт. Ол иһигэр, Дьокуускайга – 2609 киһи, Мэҥэ Хаҥаласка – 424, Аммаҕа – 279, Ньурбаҕа – 177, Сунтаарга – 129 киһи быһыыны ылбыттар.
Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, “Роспотребнадзор” уурааҕын уонна өрөспүүбүлүкэҕэ ылыллыбыт нуорма-быраап базатын чэрчитинэн, үлэни биэрээччилэргэ кэккэ быраабылалар киирдилэр. Ол курдук, тэрилтэ салайааччылара үлэһиттэрэ үлэлииллэригэр куттала суох усулуобуйаны тэрийиэхтээхтэр. Быһыыны ылалларыгар, үлэлиир сиргэ кыраадыһы кээмэйдэнэллэригэр, тумуулаабыт дьон уопсастыбаннай сиргэ сылдьыбаттарыгар, о.д.а. усулуобуйа оҥоһуллуохтаах.
— Кытаанах локдауну киллэриҥ, сорох тэрилтэлэри сабыҥ диэн этиилэр киирэллэр. Ол эрээри, биһиги итинник миэрэлэри ылыммаппыт, тоҕо диэтэр, маассабай вакцинация ыарыыны тохтотор кыахтаах, — диэн Ольга Балабкина эттэ.
Ангелина Васильева, «Саха сирэ» хаһыат, edersaas.ru
Хаартыска: sakha.gov.ru