Үс Хатыҥҥа Ил Дархан э.т. Айсен Николаев суруналыыстарга анаан пресс-кэмпириэнсийэ оҥордо.
edersaas.ru
Тэрээһиҥҥэ араас омук сирдэриттэн, Араассыыйа регионнарыттан, өрөспүүбүлүкэ улуустарыттан кэлбит суруналыыстар кыттыыны ыллылар.
Быйылгы ыһыахха суруналыыс элбэҕэ сөхтөрдө. Ол да иһин буолуо, араас ис хоһоонноох ыйытыы үгүс.
Холобура, Москваттан саха Ыһыаҕын туһунан документальнай киинэ уста кэлбит суруналыыс:
«Үс Хатыҥҥа буола турар улахан тэрээһиҥҥэ киһи сувенир быһыытынан тугу атыылаһыан сөбүй?» — диэн ыйыппытыгар Айсен Николаев:
— Биллэн турар, күннээх настырыанньаҕа эбэн саха оҥоһуктарын талбыккын ылан барыаххын сөп. Ас атыылаһыаххын баҕардаххына, эт-үүт ас арааһа баар, мас-тимир оҥоһугу этэ да барбаккын. Ырыа-тойук эмиэ хас былаһаакка аайы буола турар. Онон баҕарбытыҥ, талбытыҥ манна барыта баар, — диэн хоруйдаата.
Израильтан сылдьар суруналыыс атын дойдуга олорор сахалар ыһыах курдук тэрээһини ыыталларын туоһуласта. Онуоха Айсен Николаев:
— Омук сирдэригэр олорор сахалар дойдуларын национальнай бырааһынньыгын өрүү өрө туталлар. Ханна да олордоллор, сахалар хайаан да диаспора тэринэн, түмсэ түһэллэр. Омук сирдэригэр олорор сахалар төрөөбүт дойдуларын ыһыаҕын бэс ыйын 21 күнүгэр хайаан да бэлиэтииллэр. Мин билэрбинэн, Словенияҕа, Турцияҕа үс сыл буолла, онно олорор саха диаспоралара ыһыах тэрийэр буолбуттара. Оттон Арассыыйа куораттарын этэ да барбаккын. Москва, Санкт-Петербург куораттарга сахалар ыһыаҕы хайаан да тэрийэллэр. Оттон Израильга 2000 тахса киһи олорор. Онно олорор сахалар төрөөбүт дойдуларын ахталлара чахчы. Ханна саха баар да, онно ыһыах хайаан да ыһыллар.
«Үс Хатыҥ туох эрэ киһини соһутар «мистикалаах» сир дуо?» — диэн ис хоһоонноох ыйытыы кытта баар буолла. Онно Айсен Николаев:
— Үс Хатыҥ — ытык сир. Ыһыах аһыллыытыгар түһүлгэни хара былыттар сабардаан турбуттара дии. Ардах түһүөх, тымныйах курдуга. Онтон Ыһыах алгыһын кэнниттэн хайдахтаах курдук күн тыктай, сылыйдай? — диэн хоруйдаабытыгар, кэлии суруналыыстар: «Кырдьык оннук!»— дии түстүлэр.
Ити курдук, Ил Дархан э.т. Айсен Николаев суруналыыстарга интэриэһиргээбит боппуруостарыгар толору, дириҥ ис хоһоонноох эппиэттэри биэрэн, айар куттаах дьон санааларын бэркэ тапта.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.