Суруналыыстар күрэстэрин кыайыылаахтара билиннилэр

Бөлөххө киир:

Саха сирин Суруналыыстарын сойууһа Бэчээт күнүн көрсө күрэс түмүктэрин таһаарда. Кыайыылаахтарга наҕараадаларын тохсунньу 13 күнүгэр туттарыахтара. Бэйэни хааччахтаныы эрэсиимэ баарынан, быйыл Пресса баала буолбат, наҕараадаламмыт дьону эрэ эҕэрдэлиэхтэрэ.

Ол курдук, “Кыһыл көмүс бөрүө” бириэмийэни “Ил Түмэн” хаһыат суруналыыһа Аламжи Будаев ылла.

Араадьыйа суруналыыстарыгар аналлаах “Кыһыл көмүс микрофон” бириэмийэ хаһаайынынан “Саха” НКИХ араадьыйанан биэрии дирекциятын эрэдээктэрэ Прокопий Хабаров буолла. Тэлэбиидэнньэ үлэһиттэригэр “Көмүс микрофону” “Саха” НКИХ Алданнааҕы филиалын шеф-эрэдээктэрэ Руслан Павлов ылла.

Дебют года” номинацияҕа “Саха” ГТРК “Сахам сирин сарсыардата” биэриитэ кыайда.

Сыл бастыҥ дизайна” ааты “Ил Түмэн” хаһыат таҥааччыта Николай Копылов ылла. “Издание года” ааты Мэҥэ Хаҥалас улууһун “Эркээйи” хаһыатыгар анаатылар.

Көдьүүстээх суруйуу” ааты Уус Алдан улууһун “Мүрү саһарҕата” хаһыат кэрэспэдьиэнэ Екатерина Захарова ылла. “Бастыҥ уопсастыбаннай кэрэспэдьиэнинэн” Маргарита Винокурова ааттанна. “Бастыҥ пресс-сулууспа” диэн Суруналыыстар сойуустарын анал бирииһинэн Ыксаллаах быһыы-майгы министиэристибэтин информацияҕа, уопсастыбаннаһы кытта сибээскэ бөлөҕүн салайааччы Ксения Рахматуллина наҕараадаланна.

Медиаперсона года” үрдүк ааты “Саха сирэ” хаһыат аксакал суруналыыһа Иван Ксенофонтов ылан, үөрүүтэ үрдээтэ. Кэллиэгэбитин Иван Ивановиһы өр сыллаах сыралаах үлэтэ сыаналаммытынан эҕэрдэлиибит!

Ангелина Васильева, “Саха сирэ” хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0