Өрөспүүбүлүкэ биллиилээх суруналыыһа, СӨ култууратын үтүөлээх үлэһитэ, СӨ Суруналыыстыкаҕа судаарыстыбаннай бириэмийэтин лауреата, Бүлүү улууһун уонна Бүлүү куоратын Бочуоттаах гражданина Николай Александрович Крылов “Олох суола” хаһыат уопсастыбаннай кэрэспэдьиэннэригэр быйыл онус төгүлүн тус бириэмийэлэрин туттарда.
Үгэс быһыытынан, быйыл эмиэ икки бастыҥ селькор айар үлэтэ бэлиэтэннэ. Ол курдук, Дьоруой Н.А.Кондаков аатынан Дьөккөн орто оскуолатын эбии үөрэхтээһиҥҥэ педагога Альбина Ионова лауреат үрдүк аатын ылла. Альбина Ионовна Бүлүү улууһун хаһыатыгар уопсастыбаннай-политическай тиэмэлэргэ тиһигин быспакка суруйар, нэһилиэгин олоҕун-дьаһаҕын, үлэһит дьонун-сэргэтин сырдатар.
Иккис лауреатынан Г.И.Чиряев аатынан Бүлүүтээҕи 1 N-дээх орто оскуола 10 “а” кылааһын үөрэнээччитэ, «Хотугу сулус» телерадиоакадемия уонна “Ориентир” пресс-киин юнкордара Николай Федоров буолла. Николай 2018 сыллаахха Дьокуускайга ыытыллыбыт Норуоттар икки ардыларынааҕы Интеллектуальнай оонньуу пресс-киинигэр ситиһиилээхтик үлэлээбитэ.
Ити курдук, өрөспүүбүлүкэ уопуттаах суруналыыһа, бэчээт бэтэрээнэ Николай Крылов айар дьоҕурдаах дьону, көхтөөх уопсастыбанньыктары, эдэр ыччаты мэлдьи өйүүрүн иһин биир дойдулаахтара олус махтаналлар.
Хаартыскаҕа: (хаҥастан уҥа) Бүлүүтээҕи «Олох суола» хаһыат эрэдээктэрэ Василий Мандаров, лауреат Николай Федоров уонна эрэдээктэри солбуйааччы Муза Федорова.
Татьяна Маркова.