СӨ суруналыыстыкаҕа Судаарыстыбаннай бириэмийэтин лауреата Н.А.Крылов “Олох суола” хаһыат уопсастыбаннай кэрэспэдьиэннэригэр олохтообут бириэмийэтин ааспыт 2021 сыллааҕы лауреаттарынан Саввинова Клара Егоровна уонна Алексей Габышев буоллулар.
Бүлүү куоратын уонна улууһун бочуоттаах олохтооҕо Саввинова Клара Егоровна 2015 сылтан А.И.Николаев аатынан Бүлүүтээҕи Албан аат мусуойун сэбиэдиссэйинэн үлэлиир.
Оройуон хаһыатыгар 1970-с сыллартан саҕалаан күн бүгүнүгэр диэри араас ыстатыйалары суруйар уопсастыбаннай кэрэспэдьиэн. Сэрии, тыыл бэтэрээннэрин үйэтитиигэ, кинилэр олохторун, үлэлэрин эдэр ыччакка тириэрдиигэ элбэхтик суруйар, ону таһынан 4 кинигэни хомуйан таһаарда, 30-ча кинигэҕэ ахтыылары суруйда. “Олох суола” хаһыакка дьиэ кэргэҥҥэ аналлаах “Алаһа дьиэ” диэн балаһаны таһаартаран, үгүс сылларга эрэдээксийэни кытта ыкса сибээстэһэн үлэлээбитэ.
Клара Егоровна комсомолтан саҕалаан улууска, өрөспүүбүлүкэҕэ биллэр уопсастыбанньык, өр сылларга дьахталлар улуустааҕы Сэбиэттэрин салайбыта, судаарыстыбанай тэрилтэлэр идэлээх Сойуустарын кэмитиэтин, улуустааҕы бэтэрээннэр Сэбиэттэрин бэрэссэдээтэлинэн талыллан ситиһиилээхтик үлэлээбитэ. Саха сирин дьахталларын элбэх сийиэстэрин дэлэгээтинэн талыллыбыта. 1991-2000 сс. Бүлүүтээҕи кыраайы үөрэтээччилэр холбоһуктарын салайааччыта.
К.Е.Саввинова ыччаты патриотическай иитиигэ эмиэ улахан суолталаах үлэни ыытар. Кини араас өрүттээх уопсастыбаннай үлэтин иһин СӨ Софья Сидорова аатынан уонна “Гражданскай килбиэн” бэлиэлэринэн, элбэх Грамоталарынан, Махтал суруктарынан бэлиэтэммитэ.
Алексей Евгеньевич Габышев Н. Г. Чернышевскай аатынан педагогическай кэллиэс устудьуона. Кэллиэскэ биир саамай актыыбынай устудьуонунан биллэр, эдэр чинчийээччи быһыытынан араас хабааннаах научнай-кэмпириэнсийэлэргэ ситиһиилээхтик кыттар. Ону тэҥэ, «Молодая пресса» диэн куруһуокка репортёрдуур (салайааччы Семёнова Ксения Максимовна).
Кэллиэс туһунан суруйуулара уонна научнай хабааннаах ыстатыйалара улуустааҕы «Олох суола» хаһыакка уонна кэллиэс анал саайтыгар хамаҕатык тахсаллар. Улуустааҕы «Олох суола» эрэдээксийэтэ Алексей Габышевы көхтөөх үлэтин, бэртээхэй суруйууларын иһин Махтал суруктарынан өрүү бэлиэтиир. Кини Бүлүүтээҕи экологическэй пуорумҥа кыттан, иккис миэстэни ылбыта. Алексей быйыл үөрэҕин бүтэрдэҕинэ, суруналыыс быһыытынан үлэлиир баҕалаах. Кини ыра санаата туоларыгар баҕарабыт.
«Олох суола» хаһыат, Бүлүү улууһа.