Суруналыыс, нэһилиэк баһылыга Муттуххай Бороҥ: «Саха ынаҕын үүтүн иһэн улааппытым»
Биир идэлээҕим, суруналыыс Валерий Васильев-Муттуххай Бороҥ билигин Үөһээ Бүлүү улууһун Үөдүгэй нэһилиэгэр баһылыгынан талыллан үлэлии-хамныы сылдьар. Ааспыт нэдиэлэҕэ Дьокуускайга үлэтинэн кэлэ сылдьан, Тыа хаһаайыстыбатын министиэристибэтин исписэлиистэрин кытта Нам Таастааҕар тахсыһа сырытта.
Онно кини “Сахаагроплем” СБТ филиалыгар иитиллэн турар саха сүөһүлэрин көрөн хараҕын сымнатта. Саҥа төрөөбүт ньирэйи көтөҕөлөөн, имэрийэн-томоруйан, сыллаан-уураан ылла. “Эһэлэрбит-эбэлэрбит, ийэлэрбит-аҕаларбыт барахсаттар баартыйа, былаас дьаһалларын олоххо киллэрээри, күргүөмүнэн олоҥхону утары охсор илиилэрин ууммуттара, кытыйаларын кытта бырастыыласпыттара, ыраас хааннаах төрүт сүөһүлэрин төрдүттэн эһэ сыспыттара”, — диир Валерий Васильевич.
Үөлээннээҕим, төһө даҕаны бөрүөттэн тэйэ быһыытыйдар, оҕо сааһын санатар маннык долгутуулаах түгэннэргэ түбэстэҕинэ, уруучукатын ороон, хааһахтан хостуурдуу суруйан сурдурҕаппытын бэйэтэ даҕаны билбэккэ хаалар идэлээх. Мантан аллара Муттуххай Бороҥ саха ынаҕар, иҥэмтиэлээх үүтүн иһэн-иҥэринэн улааппыт Бээгэйигэр, анаабыт хоһоонун билиһиннэрэбин.
Сахам ынаҕа
Көрбөтөх ыраатта саадьаҕай
Мин эбэм кырдьаҕас ынаҕын,
Кып-кылгас атахтаах тот Бээгэй
Кыбыыга кэбинэ сытарын.
Чохоолбор куттаран испитим
Хоп-хойуу сөлөгөй өҥ үүтүн,
Сэттэбэр диэритин билбитим
Тотоойу ирээттээх өлүүбүн.
Аан бастаан эбээбэр амсайтым
Уоһахтаах алаадьы амтанын,
Сарсыарда дуоһуйа сиэбитим
Үрүҥ ас эгэлгэ арааһын.
Ынахпыт барахсан сааһыран,
Эрэйдээх эбиитин кытараан,
Муҥнаахпыт идэһэ буоларга
Туттуллар ыйааҕа кэлбитэ.
Бээгэйим бүтэһик үүтүттэн
Минньигэс араҕас арыыбын
Килиэппэр халыҥнык биһэммин
Өрөбүл күн сиэбит эбиппин.
Күн бүгүн суохтуубун саадьаҕай
Кыракый мин сахам ынаҕын,
Кып-кылгас атахтаах бор Бээгэй
Кыбыыга кур от сии турарын.
Василий НИКИФОРОВ.