Култуура бочуоттаах үлэһитэ, бэчээт туйгуна, 2002-2008 сылларга суруналыыстар сойуустарын бэрэссэдээтэлэ, саха суруналыыстыкатын бэтэрээнэ Иван Васильевич Борисов 80 сааһын томточчу туолла.
Борисов үөлээннээхтэрэ уонна суруналыыстар кини дэгиттэр суруналыыс буоларын бэлиэтииллэр. Кини бэрэссэдээтэллиэн иннинэ, 1984 сыллаахтан ССРС суруналыыстарын сойууһун эппиэттиир сэкиритээринэн, 1992 сыллаахтан Саха сирин суруналыыстарын сойууһун бэрэссэдээтэлин солбуйааччынан үлэлээбит. Төһө даҕаны аҕам саастааҕын иһин, сыл аайы Иван Васильевич уоннуу кинигэни оҥорон, эрэдээксийэлээн таһаарар.
Иван Васильевич Борисов Үөһээ Бүлүү Дүллүкү нэһилиэгэр төрөөбүт. Дьокуускайга 1956 с. связиһынан үлэлээн саҕалаабыт. Үс сыл Сэбиэскэй аармыйааҕа сулууспалаабыт. 1957 сыллаахтан суруйар. Бастакы матырыйааллара «Кыым», «Эдер коммунист», «Социалистическая Якутия» уонна «Молодой коммунист» хаһыаттарга тахсыбыттар. Кэлин «Советская Россия», «Красная звезда», «Советский спорт» о.д.а. хаһыаттарга суруйара. «Якутский университет» хаһыакка өр кэмҥэ кылаабынай эрэдээктэринэн үлэлээбит. 1976 — 1984 Гостелерадио ЯАССР ( билиҥҥи «Саха» НКИК) старшай эрэдээктэринэн үлэлээбит.
Икки кыыс оҕолоох, үс сиэннээх, биир хос сиэннээх.