Суруллубуту сэҥээрии: Институт тэриллэрэ уолдьаста!...
Олох-дьаһах

Суруллубуту сэҥээрии: Институт тэриллэрэ уолдьаста!

Саха Өрөспүүбүлүкэтин Наукаларын академиятын бэрэсидьиэнэ Василий Филиппов “Саха сирэ” хаһыат 2019 сыл алтынньы 24 күнүгэр тахсыбыт интервьютыгар: “Сүрүн сорук – Саха сирэ социальнай уонна экэнэмиичэскэй сайдыытыгар Наукалар академиялара ситимнээччи буолуохтаах… Билигин академияҕа биир даҕаны институт суох, салаалар уонна кииннэр бааллар…

edersaas.ru.
Өрөспүүбүлүкэҕэ баар научнай институттары барыларын биир сомоҕо холбоон, саҥа сүүрээннэри, хайысхалары толкуйдаан, бырагыраамалары, сокуоннары оҥорон, Саха сирэ 2020–2021 сылларга научнай-технологическай сайдыытыгар туһулуохтаахпыт”, —диэн сиэрдээхтик эппит. Ону ситэрэр курдук эмиэ бу хаһыат 2019 сыл ахсынньы 19 күнүгэр тахсыбыт нүөмэригэр Василий Винокуров “Саха сылгыта – норуот дьылҕата” диэн ыстатыйатыгар: “…Саха сылгытын экэниэмикэтин институтун тэрийиэххэ! Бу институт төрүт салааларбытынан, чуолаан, сылгыны уонна табаны иитии экэниэмикэтин боппуруостарынан дьарыктаныахтаах”, – диэн туруорууну оҥордо.
1986 с. Арассыыйа Наукаларын академиятын Сибиирдээҕи салаатын Саха сиринээҕи Научнай киинэ 85 үлэһиттээх эрдэҕинэ, 250 үлэһиттээх Хотугу сир экэниэмикэтин эрэгийиэннээҕи института тэриллибитэ. Ол эрээри, бу институт сайдан иһэрин оннугар, сылын аайы үлэһитин ахсаана сарбыллан, 2010 с. 80 эрэ научнай үлэһиттээх буолбута, 2011 с. Үөрэххэ уонна наукаҕа федеральнай министиэристибэ бирикээһинэн, Хотугулуу-Илиҥҥи федеральнай университекка холбоммута. Оччолорго институкка 65 киһи, ол иһигэр тоҕус наука дуоктара уонна 25 наука хандьыдаата үлэлииллэрэ. Билигин институт туспа юридическай сирэй буолбатах, 15 эрэ научнай үлэһиттээх, университет дьоҕус салаата буолла, урут тыа хаһаайыстыбатын экэниэмикэтин научнай-чинчийэр салаа баара сарбыллан, билигин суох.
Онон, Василий Винокуров саамай сөптөөх боппуруоһу туруорда. Чахчы, Саха Өрөспүүбүлүкэтин Наукаларын академиятыгар Тыа хаһаайыстыбатын экэниэмикэтин научнай-чинчийэр институтун тэрийэр олус наада уонна олох ирдэбилэ буолла. Оччотугар эрэ Хотугу сир тыйыс усулуобуйатыгар олохсуйбут өбүгэлэрбит үгэс буолбут дьарыктарын: сылгыны, ынах сүөһүнү уонна табаны иитиини саҥа научнай төрүттэргэ олоҕуран салгыы сайыннарыы, олох уйгутун өрө таһаарыы ситиһиллиэҕэ.

Михаил Никифоров, Хоту сир экэниэмикэтин эрэгийиэннээҕи институтун 2003–2016 сс. ыстаарсай научнай үлэһитэ.

«Саха сирэ» хаһыат, edersaas.ru. саайтка анаан

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

шесть − три =