Cаха Өрөспүүбүлүкэтин Суруйааччыларын сойууһун (бэрэссэдээтэл норуодунай бэйиэт И.Мигалкин) ситэриилээх сүбэтин уочараттаах мунньаҕар дойду үгүс норуоттарын дьонун долгуппут өрөспүүбүлүкэлэргэ национальнай тыллар үөрэх кыһаларыгар үөрэтиллиилэрин туһунан Федеральнай сокуон барылын тула бу дьыл бэс ыйын 5 күнүгэр кэпсэтии ыытылынна.
“Күрүлгэн” литературнай сурунаал сүрүн эрэдээктэрэ Афанасий Гуринов-Арчылан сокуон барылын ымпыгын-чымпыгын быһааран иһитиннэрии оҥордо, өрөспүүбүлүкэ Ил Түмэнин үөрэҕириигэ, култуураҕа уонна иһитиннэрэр-биллэрэр эйгэҕэ сис кэмитиэтэ барылы көрөн-үөрэтэн баран, сүнньүнэн тустаах пууннарга тосту уларытыылар киириэхтээхтэрин ыйбытын тоһоҕолоон бэлиэтээтэ.
Суруйааччы Гавриил Адамов айар дьон, тыл уустара саха тылын дьылҕатыгар тыын боппуруос көрүллэр кэмигэр туора туруо суохтаахтарын, инники күөҥҥэ сылдьыахтаахтарын ыйда, киин куоракка, улуустарга бу боппуруос дьону-сэргэни, төрөппүттэри олус долгутарын туһунан кэпсээтэ, үгүс уопсастыбаннай тэрилтэлэр быһаччы үлэлэһэллэрин, норуокка ыҥырыы таһааралларын эттэ.
Сойуус солбуйар бэрэссэдээтэлэ Владислав Доллонов киин былаас сорох биэдэмэстибэлэрэ национальнай тыллар статустарыгар, төрөөбүт тылы үөрэтиигэ сэрэҕэ, бэлэмэ суох сыһыаннаһаллара дойдуга, өрөспүүбүлүкэлэргэ балаһыанньаны хамсатар, уустугурдар кутталлааҕын эттэ уонна суруйааччылар бу боппуруоска туора турбаттарыгар ыҥырда.
Түмүккэ, саха суруйааччыларын ситэриилээх сүбэлэрэ биир санаанан Ил Түмэн үөрэҕириигэ, култуураҕа уонна иһитиннэрэр-биллэрэр эйгэҕэ сис кэмитиэтин чилиэннэрин бигэ санааларын өйүүргэ уурда уонна Ил Түмэн дьокутааттарын үүнэр ыччаппыт дьылҕатыгар олус болҕомтолоохтук сыһыаннаһан, саха тылын судаарыстыбаннай статуһун толору таһымынан өйүүллэригэр, көмүскүүллэригэр ыҥырда.
Хаартыска — интэриниэттэн.
Владислав ДОЛЛОНОВ, “Саха сирэ” хаһыат, edersaas.ru