Суруйааччылар ассоциациялара «Эдэр гвардиялары» кытары көрүстэ

Бөлөххө киир:

Сэтинньи 11 күнэ, Былатыан Ойуунускай төрөөбүт күнэ кэрэ-бэлиэ түгэннэри бэлэхтээтэ.  Арассыыйаҕа эрэ буолбакка, омук дойдутугар киэҥник биллэр «Эдэр гвардия» («Молодая гвардия») кинигэ кыһатын дириэктэрин бастакы солбуйааччы Елена Камедчикова уонна кылаабынай эрэдээктэри бастакы солбуйааччы Мария Залесская Саха сиригэр ыалдьыттаатылар. Кинилэр өрөспүүбүлүкэ баһылыгын уонна бырабыыталыстыбатын дьаһалтатын салайааччы, бастакы вице-премьер э.т. Юрий Куприяновтыын көрүстүлэр.

Көрсүһүү кэмигэр «Эдэр гвардия» бырайыактарыгар, чуолаан «Уһулуччулаах дьон олоҕо» («Жизнь замечательных людей») серияҕа бииргэ үлэлэһии туһунан кэпсэттилэр. «Уһулуччулаах дьон олоҕо» серияҕа бастакынан саха литэрэтиирэтин төрүттээччилэр Алексей Кулаковскай-Өксөкүлээх Өлөксөй, Былатыан Ойуунускай тустарынан кинигэлэр тахсыбыттара. Арассыыйаҕа Литэрэтиирэ сылыгар СӨ Ил Дархана Егор Борисов уонна бырабыыталыстыбата Былатыан Ойуунускай туһунан кинигэни «Уһулуччулаах дьон олоҕо» серияҕа таһаарар туһунан Саха сирин суруйааччыларын сойууһун  өйөөбүтэ. Бырайыагы норуодунай бэйиэт Наталья Харлампьева сүрүннээбитэ.

molodaya-gvardiya-1

Ыалдьыттар Б.Ойуунускай пааматынньыгар сибэкки дьөрбөтүн уурдулар. Бу күн СӨ Профсоюһун саҥа дьиэтигэр суруйааччылар ассоциациялара тэрийбит көрсүһүүтүгэр кэллилэр. Көрсүһүүгэ норуодунай бэйиэттэр, суруйааччылар Наталья Харлампьева, Иван Мигалкин, Андрей Кривошапкин уо.д.а. суруйааччылар кытыннылар.

Манна сыһыаран эттэххэ, «Уһулуччулаах дьон олоҕо» серияҕа историяҕа биллэр-көстөр суолу-ииһи хаалларбыт дьон туһунан кинигэлэр бэчээттэнэллэр.

«Саха сиригэр сырыыбыт дьикти үчүгэйдик баран иһэр. Биһиги инникитин бииргэ үлэлиэхпититтэн олус үөрэбит. Национальнай дьоруойдары өрө тутуохпутун, кинилэр олохторун бүтүн Арассыыйа, салгыы аан дойду таһымыгар таһаарыахпытын баҕарабыт. Тоҕо диэтэххэ, бу сериябытын омук сиригэр үчүгэйдик билэллэр. Онон, кинигэ Арассыыйа таһыгар таҕыстаҕына, өссө аан дойду сыанабылын ылар. Ити – дьоһун суолталаах. Онон бииргэ үлэлииргэ кыһаллыахпыт», – диэн кинигэ кыһатын дириэктэрдэрин солбуйааччылар санааларын үллэһиннилэр.

Иван Васильевич Мигалкин өссө 43 сыл анараа өттүгэр аан бастаан «Эдэр гвардияҕа» киирэ сылдьан, саха суруйааччылара бу серияҕа бэчээттэниэхтэрин туһунан ыра санаа оҥостубутун, ол баҕата туолбутун туһунан үөрүүтүн үллэһиннэ.

Медицинскэй наука доктора Карл Башарин аҕатын, сахалартан бастакы наука доктора, СГУ ректора Георгий Башарин туһунан быйыл күн сирин көрбүт «Якутский Ломоносов» кинигэтин бэлэхтээтэ уонна Сэмэн Данилов «Мой русский язык» хоһоонун доргуччу аахта. РФ Хотугулуу-Илиҥҥи норуоттар тылларын уонна култууратын институтун профессора Зоя Башарина Саха сирин суруйааччыларын айымньыларын тылбаастааһын билигин хаһааҥҥытааҕар да суолталааҕын, онон бииргэ үлэлииргэ суол аһыллыбытын астына бэлиэтээтэ.

«Уһулуччулаах дьон олоҕо» серияҕа Б.Ойуунускай туһунан кинигэни бэчээттэппит Олег Сидоров: «Биһиги инники бырайыактарбытын бэҕэһээҥи көрсүһүүлэргэ дьүүллэстибит. Ассоциация суруйааччылар икки сойуустарын түмэр, литэрэтиирэҕэ уонна тылбааска үлэлэри сүрүннүүр. Инникитин да эһигини кытары бииргэ үлэлииргэ бэлэммит», – диэн күндү ыалдьыттарга ис сүрэҕиттэн махтанна уонна самаан сайыны көрсөр улуу тунах Ыһыахха кэлэн ыалдьыттыылларыгар ыҥырда.

Кинигэ кыһатын бэрэстэбиитэллэрэ эбиэт кэнниттэн Б.Ойуунускай аатынан мусуой саҥа экспозицията аһыллыытыгар уонна О.Сидоров кинигэтин сүрэхтэниитигэр кытыннылар.

Надежда ЕГОРОВА.

+1
0
+1
0
+1
0
+1
0
+1
0
+1
0
+1
0