«Туох барыта ыйаахтаах», “кэмнээх-кэрдиистээх” диэн этиилэр бу күннэргэ мин үлэбэр ордук суолталаммыт курдук буоллулар. Ол эбэтэр, билэр киһим көрдөһүүтүнэн сахалыы кинигэни нууччалыы тылбаастыырга сөбүлэһэн баран, “илиим кыайан тиийбэккэ” сылдьыбыта диэн кэпсиир суруналыыс, суруйааччы Надежда Егорова-Намылы.
— Арай, эмискэ тиэхиньиичэскэй наука хандьыдаата, ХИФУ информационнай технологияларга кафедратын доцена Василий Мигалкин оҥорбут электроннай тылдьыта Яндекска баар буолбутун истэн, “Эдэр саас” сайтыгар киирэн, сүтэрбиппин булбут курдук буоллум. Онон, бу Василий Васильевич оҥорбут тылдьыта миэхэ улаханнык көмөлөстө, күн-ый буолла, үөһэттэн ыйыллан кэллэ диэн этиэхпин сөп. Инникитин даҕаны төһөлөөх киһиэхэ көмөлөөх, туһалаах буолуон саарбахтаабаппын.
Бэйэбин бэрэбиэркэлэнэн, мунаарар эрэ кэмнэрбэр тылдьыты арыйдарбын да, элбэх саҥаны биллим, сэргээтим. Бириэмэлээх киһи төһө баҕарар хасыһан, тылы оонньотон, тыл суолтатын, туттуллар эйгэтин (таарычча, өс хоһооннорун) элбэҕи билииһи. Урут sakhatyla.ru электроннай тылдьыты туттар этим. Василий Мигалкин саҥа тылдьытын ордук астынным, Тоҕо диэтэххэ, манна аҥаардас тыл судургу тылбааһа эрэ тахсыбат, олоҕурбут бөлөх тыллар эмиэ бааллар. Холобур, “тыл” диэн тылбааһын көрдөөн көрүҥ эрэ. Төһөлөөх элбэх суолтаҕа көрдөрүллүбүтүй? “Тыл тахсыбат” диэн тылбааһа “язык не поворачивается” уонна “не решается сказать” уо.д.а. диэн буолан биэрдэ. Дьэ, манна этииҥ суолтатыттан көрөн, биирин талаҕын. Эбэтэр “мындаа” диэн тылы көрдөөбүппэр “былыргы дьыл мындаатыгар” диэн олоҥхо тыллара, арахсыспат ситим этии тахсан кэллэ. Итинник холобурдар элбэхтэр. Кырдьыга да, 102 тыһыынча тыл киирбит.
Бу саҥа тылдьыт интэриниэккэ баар буолбута ордук кэрэхсэбиллээх. Үлэлии олорон, тылдьыт кинигэлэр лиистэрин арыйталыы олорбокко, манна киирдиҥ, наадалаах тылгын суруйдуҥ да булан ыларыҥ ордук табыгастаах. Быһата, экраҥҥар хас да сирэйи арыйан, тэҥҥэ тутан олорон үлэлиэххин сөп. Тылдьыт “сахабыт тыла сүтэн-симэлийэн эрэр” диэн сэрэхэдийэр бириэмэбитигэр, тоҕоостоох кэмҥэ тахсыбыта хайҕаллаах. Бу электроннай үлэ саха тылын үөрэтэр атын омук дьонугар эмиэ туһалаах буолуоҕа.
Сахабыт тыла тутахсыйбатын, туттуллар эйгэтэ кэҥиирин туһугар сыратын-сылбатын биэрбит уонна кэлэр көлүөнэҕэ сүҥкэн үлэни утары ууммут Василий Мигалкиҥҥа, бырагырааманы оҥорбут тэхиньиичэскэй наука хандьыдаата, ХИФУ радиофизикаҕа уонна электроннай системаларга кафедра доцена Ньургун Леонтьевка улахан махталбытын этиэҕиҥ, — диэн Надежда Парфеньевна санаатын үллэһиннэ.