Сургуулукка субуотунньуктаан, кыаммат ыалларга муус ылан биэрдилэр

Үөһээ Бүлүү Сургуулугар нэһилиэк дьаһалтатын (баһылык Юрий Филиппов) көҕүлээһининэн, дьаһалта исписэлиистэрэ уонна бүддьүөт тэрилтэлэрин үлэһиттэрэ Өктөөп өрөбүлүгэр, аныгылыынан Сомоҕолоһуу күнүгэр түбэһиннэрэн, нэһилиэк кыаммат ыалларыгар – тыыл, үлэ бэтэрээннэригэр, инбэлииттэргэ, элбэх оҕолоох аҥаардас ийэлэргэ уонна оскуолаҕа «итии аһылыкка», балыыһаҕа анаан кыстык муустарын ылан биэрдилэр.

edersaas.ru

«Сыл ахсын маннык көмөнү тэрийэбит, – диир Юрий Юрьевич. – Ол эрээри, быйыл субуотунньукка тахсааччы ахсаанын уонна хааччыйар ыалбытын балачча эбэн биэрдибит. Бары дьиҥ-чахчы туораттан көмөҕө наадыйар, бэйэлэрэ муус ылынар кыаҕа суох дьон».

Элбэх киһи саба түһэн, ким мууһу ылыыга, ким тиэйиигэ күргүөмнээхтик үлэлээн, ыал ахсын тыраахтарынан тута биирдии сыарҕа мууһу таһааран, кыһыны быһа иһэр ууларын хааччыйбыттара хайҕаллаах.

Хаартыскаҕа: субуотунньук кыттыылаахтара.

Василий НИКИФОРОВ, edersaas.ru