Маны аах Тыа хаһаайыстыбата Уопсастыба

Сургуулукка сыспай сиэллээх өссө дэлэйиэ

Сургуулук Үөһээ Бүлүү улууһун биир саамай ыраах сытар нэһилиэгинэн буолар. Нэһилиэнньэтэ өбүгэлэрин саҕаттан сыспай сиэллээҕи, хороҕор муостааҕы хамаҕатык иитэн быр-бааччы олорор. Былырыыҥҥыттан саҕалаан нэһилиэккэ сыспай сиэллээҕи иитэр «Ыйылас» кээпэрэтиип  улуустааҕы тыа хаһаайыстыбатын управлениетын быһаччы көмөтүнэн тэрилиннэ. 

Кээпэрэтииби үүннээн-тэһииннээн тэрийээччи  Николай Тарасов бу күннэргэ Амматтан, Чурапчыттан 50 убаһаны аҕалан, Ыйылас  түбэтигэр оҥоһуллубут базаҕа ыытта. Бакый диэн сиргэ 2021 сыллаахха сылгы базата тэриллибитэ. Сылгыһыттар олорор дьиэлэрэ, 2 боксалаах гараж тутуллубута. Бакый күөлэ эргиччи күрүөлэммитэ-хаһааламмыта.   Эбии Амма улууһуттан 50 убаһаны аҕалыахтара.

Сергей Иванов,  Үөһээ Бүлүүтээҕи тыа хаһаайыстыбатын управлениетын  начаалынньыга:

Былырыын сайын устата Николай Тарасовтаах база дьиэтин-уотун, күрүөтүн-хаһаатын дьаныһан туран туппуттара уонна оттообуттара. СӨ Тыатын хаһаайыстыбатын министиэристибэтин быһаччы туруорсуутунан  «Ыйылас» кээпэрэтиип  Арассыыйа Тыатын хаһаайыстыбатын министиэристибэтин куонкуруһугар кыттан, анал грант ылбыта. Ол үбүнэн 100 убаһаны атыыластылар. Онон кээпэрэтиип  толору тэрилиннэ.  Сургуулук нэһилиэгин сылгылара ити кэпэрэтиипкэ туруохтара.  Биэлэрин холбообут чааһынай дьоҥҥо  Тыа хаһаайыстыбатын министиэристибэтиттэн 3000-түү солк. көрүллүөҕэ. Кээпэрэтиип инники өттүгэр күүскэ ылсан үлэлиэ диэн эрэнэбин.

 

edersaas.ru

 

 

 

2
0
Telegram @edersaas20