Полиция оперативниктара бу ааспыт суукка иһигэр сураҕа суох сүппүтүнэн ааҕыллыбыт биэс киһини буллулар.
Вера МАКАРОВА, «Саха сирэ», https://edersaas.ru/
СӨ ИДьМ-тын пресс-сулууспата иһитиннэрбитинэн, бу сүрүннээн, 40 саастарыгар диэри саастаах дьон. Уонна үксүгэр олоххо оттомо суохтук сыһыаннаһар, көрү-нары, күүлэйи батыһар дьон эбит. Сол курдук дьиэлэриттэн тахсан бардылар да, ууга тааһы бырахпыттыы сүтэн хаалаллар. Саатар дьонноругар эрийэн, ханна баалларын, сылдьалларын биллэрбэттэр эбит.
Холобур, букатын 2015 сыл сэтинньи ыйыттан сүппүтүнэн ааҕыллыбыт 36 саастаах дьахтар көһүннэ. Саҥа тапталын көрсөн, ол киһиэхэ олорбут. Дьонугар биллэрбэтэх даҕаны.
Дьокуускай куорат 29 саастаах олохтооҕо былырыын сүппүтэ — эмиэ билэр киһитигэр олорбут.
Оттон 23 саастаах уол саҥа дьыллааҕы бырааһынньыктар кэмнэригэр дьиэтиттэн тахсан барбыт да, ол айыыта онон. Үс нэдиэлэ устатыгар дьонугар сибээскэ тахсыбатах.
Полиция сэрэтэр: өскөтүн чугас киһиҥ сүттэҕинэ, олорор сириҥ Ис дьыалаҕа отделыгар кэлэн, бэйэҥ докумуоҥҥун көрдөрөҕүн уонна сүппүт киһини туоһулуур докумуоннары аҕалаҕын.
Маныаха бу киһи тас көрүҥүн сиһилии, үчүгэйдик ойуулаан биэриэхтээххин, хаартыскатын илдьэ кэлиэхтээххин. Тугунан дьарыктанарын, майгытын-сигилитин, сыһыаҥҥытын, кимнээҕи кытта алтыһарын, ханна тиийиэн сөбүн — быһата, кини туһунан тугу билэргитин барытын ыраас мууска ууран биэрэҕит.
Быраабы араҥаччылыыр уорганнарга төһөнөн түргэнник биллэрэҕит да, соччонон сүппүт киһини көрдөөһүн суһаллык саҕаланар.
Вера МАКАРОВА, «Саха сирэ», https://edersaas.ru/
Хаартыска: интернеттэн.